വീരേന്ദ്ര കുമാറിന് ഇടതു മുന്നണിയിലേക്ക് തിരിച്ചുവരാമെന്ന് കോടിയേരി ബാലകൃഷ്ണൻ !

വീരേന്ദ്ര കുമാറിന് ഇടതു മുന്നണിയിലേക്ക് തിരിച്ചുവരാമെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണൻ. എൽഡിഎഫിന്റെ വാതിലുകൾ അദ്ദേഹത്തിന്റെ മുമ്പില്‍ അടഞ്ഞട്ടില്ല. വീരേന്ദ്ര കുമാര്‍ പുനർ വിചിന്തനം നടത്തി തിരിച്ചു വരണമെന്നാണ് ആഗ്രഹിക്കുന്നതെന്നും കോടിയേരി പറഞ്ഞു.

യുഡിഎഫിലെ ചേരിതിരിവിന്റെയും പൊട്ടിത്തെറിയുടെയും ഫലമായാണ് വീരേന്ദ്രകുമാർ രാജ്യസഭ എംപി സ്ഥാനം രാജിവയ്ക്കാൻ പോകുന്നത്. ഈ തീരുമാനത്തെ സിപിഎം സ്വാഗതം ചെയ്യുന്നു. അദ്ദേഹം നയം വ്യക്തമാക്കിയാല്‍ ഉടന്‍ തുടർ നടപടികളിലേക്കു സിപിഎം കടക്കുമെന്നും കോടിയേരി വ്യക്തമാക്കി.