വ്യാജരേഖ ചമച്ച്‌ ഭൂമിതട്ടിപ്പ്‌ : ഹൈറേഞ്ച് സമര നായകന്‍ ജോയ്‌സ് ജോര്‍ജ്ജ് എംപിയുടെ പട്ടയം റദ്ദാക്കി

ഹൈറേഞ്ച് സംരക്ഷണ സമിതിയിലൂടെ ശ്രദ്ധേയാനായി മാറിയ ജോയ്‌സ് ജോര്‍ജ്ജ് എംപിയുടെ പേരിലുള്ള 25 ഏക്കര്‍ ഭൂമിയുടെ പട്ടയം റദ്ദാക്കി. സര്‍ക്കാരിന്റെ തരിശുഭൂമിയാണെന്ന കണ്ടെത്തലിനെ തുടര്‍ന്ന് ജോയ്‌സ് ജോര്‍ജ്ജ് അടക്കമുള്ള ആറുപേരുടെ വട്ടവട പഞ്ചായത്തിലെ കൊട്ടാക്കമ്പൂര്‍ വില്ലേജിലെ ഭൂമിയുടെ കൈവശാവകാശമാണ് റദ്ദാക്കിയത്. ദേവികുളം സബ് കളക്ടറുടേതാണ് നടപടി.

പട്ടികജാതിക്കാര്‍ക്ക് വിതരണം ചെയ്ത ഭൂമിയാണ് കൈവശം വെച്ചിരുന്നതെന്നും ഭൂമി തട്ടിയെടുക്കാന്‍ വയാജരേഖ ചമച്ചെന്നും ഒരു ദിവസം കൊണ്ട് എട്ട് പട്ടയങ്ങള്‍ നല്‍കിയെന്നുമാണ് കണ്ടെത്തല്‍. കാണാതായ രേഖകള്‍ കണ്ടെത്തിയതാണ് നിര്‍ണ്ണായകമായത്. 2013 ലെ ലോക്‌സഭാ തെരഞ്ഞെടുപ്പില്‍ നാമനിര്‍ദേശ പത്രികയ്ക്ക് ഒപ്പം നല്‍കിയ സത്യവാങ്മൂലത്തില്‍ ജോയ്‌സ് ജോര്‍ജ്ജിന്റെയും ഭാര്യ അനൂപയുടേയും പേരില്‍ എട്ട് ഏക്കര്‍ ഭൂമി കൊട്ടാക്കമ്പൂരില്‍ ഉള്ളതായി പറഞ്ഞിരുന്നു. എന്നാല്‍ ഇത് സംബന്ധിച്ച ചില പരാതികളുടെ അടിസ്ഥാനത്തില്‍ നടന്ന പരിശോധനകളിലാണ് ഭൂമി തട്ടിപ്പ് ബോദ്ധ്യപ്പെട്ടത്.