പ്രതിപക്ഷ നേതാവിന് അകമ്പടി പോകേണ്ടതിനാല്‍ പൊലീസ് സഹായിച്ചില്ല ; വാഹനമിടിച്ചു വൃദ്ധന്‍ മരിച്ചു

തമിഴ്‌നാട് സ്വദേശി മുരുകന്‍ ചികിത്സ കിട്ടാതെ മരിച്ച സംഭവം വന്‍ വിവാദം ഉയര്‍ത്തുമ്പോള്‍ കൊല്ലത്ത് പൊലീസിന്റെ നിഷേധാത്മകനിലപാട് മൂലം ഒരു ജീവന്‍ പൊലിഞ്ഞു. വാഹനമിടിച്ച് വഴിയില്‍ കിടന്ന വൃദ്ധനെ നാട്ടുകാര്‍ ആശുപത്രിയില്‍ എത്തിക്കാന്‍ പോലീസിന്റെ സഹായം തേടിയെങ്കിലും പോലീസ് നിരസിക്കുകയായിരുന്നു. ചവറയില്‍ ഇന്നലെ രാത്രിയില്‍ ഉണ്ടായ അപകടത്തില്‍ വൃദ്ധന്‍ മരിച്ചു.

ഇന്നലെ രാത്രി 11.30 യോടെ നീണ്ടകരയില്‍ വെച്ച് വൃദ്ധനെ കാറിടിക്കുകയായിരുന്നു. തുടര്‍ന്ന് കാറ് നിര്‍ത്താതെ പോകുകയും നാട്ടുകാര്‍ വൃദ്ധനെ ആശുപത്രിയില്‍ എത്തിക്കാന്‍ വാഹനമൊന്നും കിട്ടാത്തതിനെത്തുടര്‍ന്ന് സമീപത്ത് കിടന്ന പോലീസ് കണ്‍ട്രോള്‍ റൂമിന്റെ വാഹനത്തിന്റെ സഹായം തേടി . എന്നാല്‍ തങ്ങള്‍ക്ക് പ്രതിപക്ഷനേതാവിന് അകമ്പടി പോകണമെന്ന് പറഞ്ഞ് ഇവര്‍ ആവശ്യം നിരസിക്കുകയായിരുന്നു.

ഒടുവില്‍ അതിലേ വന്ന മുഴുവന്‍ വാഹനങ്ങള്‍ക്കു കൈ നീട്ടിയിട്ടും ഒരെണ്ണം പോലും നിര്‍ത്താതായ സാഹചര്യത്തില്‍ കൊല്ലം ജില്ലാ ആശുപത്രിയിലെ ആംബുലന്‍സ് വിളിച്ചു വരുത്തിയാണ് ആശുപത്രിയിലേക്ക് കൊണ്ടുപോയത്. എന്നാല്‍ കൊല്ലം മെഡിക്കല്‍ കോളേജിലേക്ക് കൊണ്ടുപോകും വഴി വൃദ്ധന്‍ മരണമടയുകയായിരുന്നു. പൊലീസ് സമയത്ത് ഇടപെട്ടിരുന്നെങ്കില്‍ ഒരു ജീവന്‍ പൊലിയില്ലായിരുന്നുവെന്ന് നാട്ടുകാര്‍ ആരോപിക്കുന്നു.