പച്ചക്കറി വിപണി പ്രതിസന്ധിയില്‍

വിലക്കയറ്റത്തോടൊപ്പം പച്ചക്കറികള്‍ക്കു ക്ഷാമവും വന്നതോടെ പച്ചക്കറി വിപണി പ്രതിസന്ധിയില്‍. കൂടുതല്‍ വിപണിയുള്ള പച്ചക്കറികള്‍ക്കാണു നിലവില്‍ ക്ഷാമം അനുഭവപ്പെടുന്നത്‌. അതോടൊപ്പം വിലയിലെ അസ്‌ഥിരതയും തുടരുന്നു. തമിഴ്‌നാട്ടില്‍ നിന്നും കര്‍ണാടകയില്‍ നിന്നും ആവശ്യത്തിന്‌ പച്ചക്കറി എത്താത്തതാണ്‌ പ്രാദേശിക വിപണികള്‍ക്ക്‌ തിരച്ചടിയാവുന്നത്‌. ഇന്നലെ ചെറുകിട വിപണിയില്‍ തക്കാളിക്കു 50രൂപയും വലിയ ഉള്ളിക്ക്‌ 30രൂപയും ചെറിയ ഉള്ളിക്ക്‌ നൂറും വെണ്ടയ്‌ക്കു 50രൂപയുമാണു വില. ഇതില്‍ തക്കാളിക്കു 40രൂപയായിരുന്നു മൂന്നുദിവസംമുമ്പുവരെ വില. വലിയഉള്ളി 18ല്‍നിന്നാണു ഇന്നലെ 30രൂപയിലെത്തിയത്‌. ഇതുപോലെതന്നെയാണു മറ്റു പച്ചക്കറികളുടേയും വില.

അതോടൊപ്പം ആവശ്യപ്പെടുന്ന അളവില്‍ പച്ചക്കറി വിപണിയിലെത്തുന്നില്ലെന്ന്‌ വ്യാപാരികള്‍ പറയുന്നു. മഴയില്‍വന്ന കുറവ്‌ പ്രാദേശികമായുള്ള പച്ചക്കറി ഉല്‍പാദനത്തേയും ബാധിച്ചിട്ടുണ്ട്‌.കാലാവസ്‌ഥാ വ്യതിയാനം കൃഷിയെ ബാധിച്ചതാണ്‌ തമിഴ്‌നാട്ടില്‍ നിന്നുള്ള പച്ചക്കറി വരവു കുറയാനിടയാക്കിയത്‌. ജിഎസ്‌ടി നടപ്പായ ശേഷമുള്ള വില നിര്‍ണയത്തിലെ അനിശ്‌ചിതാവസ്‌ഥയും വിപണിയെ തളര്‍ത്തുന്നു.