‘ആത്മഹത്യ ഗെയിം’ ഇന്ത്യയിലും പിടിമുറുക്കുന്നതായി സൂചന ; പതിനാലുകാരന്‍ കെട്ടിടത്തില്‍ നിന്ന് ചാടി മരിച്ചു

'ആത്മഹത്യ ഗെയിം' ഇന്ത്യയിലും പിടിമുറുക്കുന്നതായി സൂചന. ബ്ലൂ വെയില്‍ ഗെയിം കളിച്ചതിന് പിന്നാലെ 14 വയസ്സുകാരന്‍ ജീവനൊടുക്കിയതായാണ് സൂചന. ഒന്‍പതാം ക്ലാസ്‌ വിദ്യാര്‍ത്ഥിയായ കുട്ടി അന്ധേരിയിലെ ഷേര്‍ ഇ-പഞ്ചാബ് കെട്ടിടത്തിന്റെ അഞ്ചാം നിലയില്‍ നിന്ന് ചാടിയാണ് മരിച്ചത്. റഷ്യയില്‍ നിന്ന് പുറത്തു വന്ന ബ്ലൂ വെയ്ല്‍ ഗെയിം കളിച്ച് വിവിധ രാജ്യങ്ങളില്‍ യുവാക്കളും വിദ്യാര്‍ത്ഥികളും ആത്മഹത്യ ചെയ്തതോടെയാണ് ആത്മഹത്യ ഗെയിം കുപ്രസിദ്ധമായത്. മുംബൈയില്‍ മരിച്ച വിദ്യാര്‍ത്ഥിയുടെ സുഹൃത്തുക്കളില്‍ നിന്നും സമൂഹ മാധ്യമങ്ങളില്‍ നിന്നുമാണ് പോലീസിന് സൂചന ലഭിച്ചത്.

വിവിധ സ്‌റ്റേജുകളുള്ള ഗെയിമിന്റെ ഓരോ സ്‌റ്റേജുകളും കളിക്കുന്നവരുടെ ധൈര്യത്തെയും വിശ്വാസങ്ങളേയും ചോദ്യം ചെയ്യുന്നവയാണ്. ഒറ്റയ്ക്ക് പ്രേത സിനിമ കാണുക, സെമിത്തേരികള്‍ സന്ദര്‍ശിക്കുക, ദേഹോപദ്രവം ഏല്‍പ്പിക്കുക തുടങ്ങി നിരവധി കാര്യങ്ങളാണ് ഗെയിം ആവശ്യപ്പെടുന്നത്. കളിക്കുന്നവര്‍ ഇത് ചെയ്യുന്നുവെന്നതാണ് ഞെട്ടിക്കുന്ന റിപ്പോര്‍ട്ട്. അവസാന സ്‌റ്റേജിലെത്തുമ്പോള്‍ മിക്കവരും ആത്മഹത്യ ചെയ്യുകയും ചെയ്യുന്നത് ഗെയിമിന്റെ പൈശാചികത വ്യക്തമാക്കുന്നു. മരണങ്ങള്‍ കൂടിയതോടെ പല രാജ്യങ്ങളും ഇത് നിരോധിച്ചു.