ആറളം ഫാമില്‍ കാട്ടാന രണ്ട്‌ ദിവസംകൊണ്ട്‌ കുത്തി വിഴ്‌ത്തിയത്‌ 30ഓളം തെങ്ങുകള്‍

ആറളം ഫാമില്‍ കാര്‍ഷിക മേഖലയില്‍ വിളയാട്ടം നടത്തുന്ന കാട്ടാന കഴിഞ്ഞ രണ്ട്‌ ദിവസത്തിനിടയില്‍ 30ഓളം തെങ്ങുകളാണ്‌ കുത്തി വിഴ്‌ത്തിയത്‌. ആറളം വനത്തില്‍ നിന്നും എട്ടുകിലോമീറ്ററോളം അകലെയുള്ള പ്രദേശത്താണ്‌ കാട്ടാനക്കൂട്ടത്തിന്റെ വിളയാട്ടം . ഫാമിന്റെ അധീനതയിലുള്ള ഒന്ന്‌, രണ്ട്‌ ബ്ലോക്കുകളിലാണ്‌ കഴിഞ്ഞ ദിവസം കാനക്കൂട്ടം കനത്ത നാശനഷ്‌ടം വരുത്തിയത്‌. മൂപ്പത്‌ വര്‍ഷത്തിലധികം പ്രായമുള്ള നിറയെ കായ്‌ഫലമുള്ള തെങ്ങുകളാണ്‌ നശിപ്പിച്ചവയില്‍ എല്ലാം. ഫാമിന്‌ വന്‍ സാമ്പത്തിക നാഷ്‌ടമാണ്‌ ഇതുമൂലം ഉണ്ടായിരിക്കുന്നത്‌. കഴിഞ്ഞ ആറുമാസത്തിനിടയില്‍ 500 ഓളം തെങ്ങുകളെങ്കിലും ആനക്കൂട്ടം നശിപ്പിച്ചിട്ടുണ്ടെന്നാണ്‌ ഫാം അധിതൃതര്‍ പറയുന്നത്‌. അഞ്ച്‌ ആനകളാണ്‌ ഫാമിനുള്ളില്‍ കറങ്ങിനടക്കുന്നത്‌. ഇവയെ വനത്തിനുള്ളിലേക്ക്‌ കയറ്റിവിടാനുള്ള ശ്രമങ്ങളൊന്നും വിജയിച്ചിട്ടില്ല.

ആനയെ തുരത്താന്‍ നേരത്തെ വനംവകുപ്പും ഫാമിലെ തൊഴിലാളികളും ജീവനക്കാരും ചേര്‍ന്ന്‌ സംയുക്‌ത നീക്കം നടത്താറുണ്ടായിരുന്നു. വനത്തിലേക്ക്‌ തുരത്തുന്ന ആന ഒരാഴ്‌ച്ച തികയുന്നതിന്‌ മുന്‍മ്പ്‌ തന്നെ വീണ്ടു ഫാമിന്റെ അധീനതയിലുള്ള പ്രദേശത്തേക്ക്‌ തിരിച്ചെത്തുകയാണ്‌ പതിവ്‌. ഇതോടെ ആനയെ ഫാമില്‍ നിന്നും തുരത്തുന്നതിനുള്ള പ്രവര്‍ത്തനങ്ങള്‍ പൂര്‍ണ്ണമായും നിലച്ചിരിക്കുകയാണ്‌.