നഴ്‌സിംഗ് സമരം: മുഖ്യമന്ത്രിയുടെ ഓഫീസ് ഇടപെടുന്നു

സംസ്ഥാനത്ത് നഴ്‌സുമാരുടെ സമരം ആശുപത്രികളുടെ പ്രവര്‍ത്തനം അവതാളത്തിലാക്കിയതോടെ പ്രശ്‌ന പരിഹാരത്തിന് മുഖ്യമന്ത്രിയുടെ ഓഫീസ് ഇടപെടുന്നു. ചര്‍ച്ചയ്ക്ക് സന്നദ്ധത അറിയിച്ച് മുഖ്യമന്ത്രിയുടെ ഓഫീസ് യുണൈറ്റഡ് നഴ്‌സസ് അസോസിയേഷന്‍ യുഎന്‍എ ഭാരവാഹികളുമായി ബന്ധപ്പെട്ടതായാണ് വിവരം. ഈ മാസം 17ന് ആരംഭിക്കാനിരിക്കുന്ന അനിശ്ചിതകാല സമരം മാറ്റിവച്ചാല്‍ ചര്‍ച്ച നടത്താമെന്നാണ് മുന്നോട്ടുവച്ചിരിക്കുന്ന നിര്‍ദേശം. അതേസമയം, നഴ്‌സുമാരുടെ ശമ്പളം വര്‍ധിപ്പിക്കുന്നതിനോട് അനുകുല നിലപാടാണെന്ന് കെ.സി.ബി.സി പ്രസിഡന്റ് ആര്‍ച്ച്ബിഷപ്പ് ഡോ.സൂസെപാക്യം അറിയിച്ചു. എന്നാല്‍ തൃശൂരില്‍ നടക്കുന്ന സംസ്ഥാന സമിതിയോഗത്തിന് ശേഷം തീരുമാനം അറിയിക്കാമെന്ന് ഭാരവാഹികള്‍ മറുപടി നല്‍കി.