തെളിയിക്കപ്പെടും വരെ ഒരാളും കുറ്റവാളിയല്ല ; ദിലീപിന് പിന്തുണയുമായി മുരളി ഗോപി

കുറ്റം ചെയ്തു എന്ന് തെളിയിക്കപ്പെടുന്നത് വരെ ഒരാളും കുറ്റവാളി അല്ലെന്ന് മുരളി ഗോപി പറയുന്നു. തന്റെ ഫേസ്ബുക്ക് പോസ്റ്റിലൂടെയാണ് മുരളി ഗോപിയുടെ പ്രതികരണം.

'കുറ്റം ചെയ്തു എന്ന് തെളിയിക്കപ്പെടുന്നത് വരെ ഒരാളും കുറ്റവാളി അല്ല. കയ്യടിയുടെയും കൂക്കൂവിളിയുടെയും ഇടയില്‍, കരുണയുടെയും ക്രൂരതയുടെയും ഇടയില്‍ ഒരു ഇടമുണ്ട്. പരിഷ്‌കൃതമായ ലോകം ഈ ഇടങ്ങളില്‍ ആണ് നിലയുറപ്പിക്കുന്നത്. നിയമം നടക്കട്ടെ. നീതി പുലരട്ടെ. കോലാഹലം അല്ല ഉത്തരം.'

മുരളി ഗോപി തിരക്കഥ തയാറാക്കിയ 'കമ്മാരസംഭവം' എന്ന ചിത്രത്തില്‍ നായകനായി അഭിനയിക്കുന്നത് ദിലീപാണ്. അവസാന ഘട്ടത്തിലാണ് ചിത്രത്തിന്റെ ഷൂട്ടിങ്. ഇതിനിടയിലാണ് ദിലീപ് അറസ്റ്റിലാവുന്നത്. രതീഷ് അമ്പാട്ട് സംവിധാനം ചെയ്യുന്ന ഈ സിനിമയില്‍ മുരളി ഗോപിയുംഅഭിനയിക്കുന്നുണ്ട്. വിവിധ കാലഘട്ടങ്ങളിലൂടെ കടന്നുപോകുന്ന ഒരു കഥാപാത്രമായാണ് ദിലീപ് ഈ സിനിമയില്‍ അഭിനയിക്കുന്നത്.