‘രാമലീല’യുടെ ഭാവി മമ്മൂട്ടിയും മോഹന്‍ലാലും തീരുമാനിക്കും

റിലീസിന് റെഡിയായിരിക്കുന്ന ദിലീപ് ചിത്രം ‘രാമലീല’യുടെ ഭാവി മമ്മൂട്ടിയും മോഹന്‍ലാലും തീരുമാനിക്കും. സംവിധായകന്‍ അരുണ്‍ ഗോപി ഈ ആവശ്യത്തിനായി മമ്മൂട്ടിയെയും മോഹന്‍ലാലിനെയും കണ്ടു. കൊച്ചി പനമ്പള്ളി നഗറിലെ മമ്മൂട്ടിയുടെ വീട്ടിലെത്തിയാണ് അരുണ്‍ ഗോപി മമ്മൂട്ടിയെയും മോഹന്‍ലാലിനെയും കണ്ടത്.

ദിലീപ് അറസ്റ്റോടെ രാമലീലയുടെ റിലീസ് സംബന്ധിച്ച് ആശങ്ക നിലനില്‍ക്കുകയാണ്. പുലിമുരുകന് ശേഷം ടോമിച്ചന്‍ മുളകുപാടം നിര്‍മ്മിച്ച സിനിമയാണിത്. 15 കോടി രൂപയോളമാണ് ചിത്രത്തിന്‍റെ ബജറ്റ്. സച്ചി തിരക്കഥയെഴുതിയ സിനിമ ഒരു പൊളിറ്റിക്കല്‍ ഫാമിലി ഡ്രാമയാണ്.

ജൂണ്‍ 20ന് ശേഷം രാമലീല റിലീസ് ചെയ്യുമെന്നാണ് നേരത്തേ ടോമിച്ചന്‍ മുളകുപാടം പറഞ്ഞിരുന്നത്. എന്നാല്‍ അന്ന് ദിലീപ് അറസ്റ്റിലായിരുന്നില്ല. ഇപ്പോള്‍ ദിലീപിനെ അറസ്റ്റ് ചെയ്തതോടെ കാര്യങ്ങള്‍ കൂടുതല്‍ കുഴപ്പത്തിലായി. ഇതോടെയാണ് മലയാളത്തിലെ മഹാനടന്‍‌മാരായ മമ്മൂട്ടിയെയും മോഹന്‍ലാലിനെയും കാണാന്‍ സംവിധായകന്‍ അരുണ്‍ ഗോപി തീരുമാനിച്ചതെന്നാണ് സൂചന.