ശബരിമല കാണിക്കവഞ്ചിയില്‍ പാകിസ്താന്‍ നോട്ട് : പോലീസ് അന്വേഷണം ആരംഭിച്ചു

ശബരിമലയിലെ കാണിക്കവഞ്ചിയില്‍ നിന്നും പാകിസ്താന്‍ കറന്‍സി കണ്ടെത്തിയ സംഭവത്തില്‍ പോലീസ് അന്വേഷണം ആരംഭിച്ചു. പലതായി മടക്കിയ 20 രൂപയുടെ പാകിസ്താന്‍ നോട്ടാണ് ഇന്ത്യന്‍ കറന്‍സികളുടെ കൂടെ കണ്ടെത്തിയത്. ജൂണ്‍ 28 ന്‌ കൊടിമര പ്രതിഷ്ഠയുമായി ബന്ധപ്പെട്ട ചടങ്ങുകള്‍ക്കായി തുറന്നപ്പോഴാണ് നോട്ട് കണ്ടെത്തിയത്.

വിവിധരാജ്യങ്ങളില്‍ നിന്നുള്ള നോട്ടുകള്‍ ശബരിമല കാണിക്ക വഞ്ചിയില്‍ നിന്നും കണ്ടെത്തുന്നത് പതിവാണെങ്കിലും പാകിസ്താന്‍ കറന്‍സി ആദ്യമായിട്ടാണ് കിട്ടുന്നത്. നോട്ടുമായി ബന്ധപ്പെട്ട് എല്ലാത്തരത്തിലുമുള്ള അന്വേഷണത്തിലാണ് പോലീസ്.സംഭവവുമായി ബന്ധപ്പെട്ട റിപ്പോര്‍ട്ട് പോലീസ് രഹസ്യാന്വേഷണ വിഭാഗത്തിന് സമര്‍പ്പിക്കും. ഇപ്പോള്‍ ശബരിമല ക്ഷേത്രത്തില്‍ നിന്നും നോട്ട് കിട്ടിയത് കനത്ത സുരക്ഷാ ഭീഷണിയായിട്ടാണ് കണക്കാക്കപ്പെട്ടിരിക്കുന്നത്.