പി.സി. ജോര്‍ജ്ജ് തോക്കെടുത്തത് സ്വയരക്ഷയ്‌ക്കെന്ന് പുറമ്പോക്കിലെ താമസക്കാര്‍

സ്വയരക്ഷയ്ക്കായാണു പി.സി. ജോര്‍ജ്ജ് എം.എല്‍.എ. തോക്കെടുത്തതെന്ന് മുണ്ടക്കയം വെള്ളനാടി എസ്‌റ്റേറ്റിനോടു ചേര്‍ന്ന പുറമ്പോക്കു ഭൂമിയിലെ താമസക്കാര്‍. ഭൂമി കൈയേറിയെന്നു കള്ളക്കേസുണ്ടാക്കി തോട്ടം ജീവനക്കാരും ഗുണ്ടകളും തങ്ങളുടെ വീട് ആക്രമിച്ചത് സംബന്ധിച്ച് മുണ്ടക്കയം പോലീസില്‍ പരാതി നല്‍കിയിട്ടും നടപടിയുണ്ടായില്ല. ഇതോടെ എം.എല്‍.എയെ സമീപിക്കുകയായിരുന്നു.

പ്രതിഷേധം കണ്ട് തിരികെപ്പോകാന്‍ ശ്രമിച്ചപ്പോള്‍ വീണ്ടും ഭീഷണിയുണ്ടായതിനാലാണ് അദ്ദേഹം തോക്കെടുത്തത്. പഞ്ചായത്തു വക പുറമ്പോക്കു ഭൂമിയില്‍ എഴുപതിലേറെ വര്‍ഷത്തെ കൈവശാവകാശ രേഖയുള്ളവരാണു താമസക്കാരെല്ലാവരും. രണ്ടു മുതല്‍ പത്തു സെന്റ് വരെ ഭൂമിയാണ് എല്ലാവര്‍ക്കുമുള്ളത്. പഞ്ചായത്തും ബ്ലോക്കും പട്ടികജാതി വികസനവകുപ്പും നല്‍കിയ വീടുകളിലാണു താമസം.

വ്യാഴാഴ്ച രാത്രിയില്‍ ഹാരിസണ്‍ എസ്‌റ്റേറ്റ് മാനേജരുടെ സല്‍ക്കാര യോഗത്തിലെ തീരുമാനപ്രകാരമാണ് മുണ്ടക്കയത്തെ ഹര്‍ത്താല്‍ ആഹ്വാനമെന്നു പി.സി. ജോര്‍ജ് എം.എല്‍.എ. പറഞ്ഞു. കൊടിയ മനുഷ്യാവകാശ ലംഘനങ്ങളും പ്രതികരിക്കുന്നവര്‍ക്കു നേരേയുള്ള ഗുണ്ടായിസവുമാണു ഹാരിസണ്‍ എസ്‌റ്റേറ്റില്‍ നടക്കുന്നത്. പണിയും വേതനവുമില്ലൊതെ തൊഴിലാളികള്‍ പട്ടിണി കിടക്കുമ്പോള്‍ ചില തൊഴിലാളി യൂണിയന്‍ നേതാക്കള്‍ സമ്പന്നരാകുകയാണ്. പൂഞ്ഞാര്‍ മണ്ഡലത്തിലുള്ള ഒരു എസ്‌റ്റേറ്റിലും മനുഷ്യാവകാശ ലംഘനങ്ങള്‍ അനുവദിക്കില്ലെന്നും തൊഴിലാളികള്‍ക്കും പരിസരവാസികള്‍ക്കും വേണ്ടി ഇനിയും ഇടപെടുമെന്നും അദ്ദേഹം വ്യക്തമാക്കി.