നേഴ്‌സുമാരുടെ സമരം :കിടപ്പുരോഗികളെ ആശുപത്രികളില്‍ നിന്നും പറഞ്ഞു വിടുന്നു

സുപ്രീംകോടതിയുടെ വിധിയുണ്ടായിട്ടും മിനിമം വേതനം വര്‍ദ്ധിപ്പിക്കാത്തതില്‍ പ്രതിഷേധിച്ച്‌ നേഴ്‌സുമാരുടെ സമരം ആരംഭിച്ചതോടെ സ്വകാര്യ ആശുപത്രികളില്‍ നിന്നും കിടപ്പുരോഗികളെ പറഞ്ഞുവിടുന്നു. ബുധനാഴ്‌ച മുതല്‍ തന്നെ കിടപ്പുരോഗികളോട്‌ നേഴ്‌സുമാരുടെ സമരം തുടങ്ങുകയാണെങ്കില്‍ ഡിസ്‌ചാര്‍ജ്‌ വാങ്ങി പോകണമെന്ന്‌ അധികൃതര്‍ ആവശ്യപ്പെട്ടിരുന്നുവത്രെ. നഴ്‌സുമാര്‍ പണിമുടക്കുന്നതിനാല്‍ കിടപ്പുരോഗികളുടെ പരിചരണം ബുദ്ധിമുട്ടാവുമെന്ന കാരണം പറഞ്ഞാണ്‌ കിടപ്പുരോഗികളെ ആശുപത്രികളില്‍ നിന്നും പറഞ്ഞുവിടുന്നത്‌.

പനി പടര്‍ന്നുപിടിക്കുന്ന സാഹചര്യത്തില്‍ നേഴ്‌സുമാരുടെ സമരം രോഗികളേയും ആശുപത്രിയുടെ പ്രവര്‍ത്തനത്തെയും സാരമായി തന്നെ ബാധിച്ചേക്കും. സുപ്രീംകോടതിയുടെ വിധിയുണ്ടായിട്ടും മിനിമം വേതനം വര്‍ദ്ധിപ്പിക്കാത്തതില്‍ പ്രതിഷേധിച്ചാണ്‌ സ്വകാര്യ ആശുപത്രികളിലെ നഴ്‌സുമാര്‍ ഇന്നലെ മുതല്‍ പണിമുടക്ക്‌ ആരംഭിച്ചത്‌. കണ്ണൂര്‍ ജില്ലയിലെ അഞ്ച്‌ സ്വകാര്യ ആശുപത്രികളിലാണ്‌ പണിമുടക്ക്‌ നടത്തുന്നത്‌.