കോട്ടയം പനിച്ച് തന്നെ…!

കോട്ടയം ജില്ലയില്‍ പനിബാധിതരുടെ എണ്ണത്തില്‍ കുറവുണ്ടാകുന്നില്ലെന്ന് റിപ്പോര്‍ട്ടുകള്‍. പനിബാധിതരുടെ എണ്ണം ആയിരം കടന്നുവെന്നാണ് നിലവിലെ റിപ്പോര്‍ട്ടുകള്‍ സൂചിപ്പിക്കുന്നത്. നാടെങ്ങും പനിച്ചു വിറയ്‌ക്കുമ്പോള്‍ സ്വകാര്യ, സര്‍ക്കാര്‍ ആശുപത്രികളില്‍ രോഗികള്‍ക്കു കിടക്കാന്‍ ഇടമില്ലാത്ത അവസ്‌ഥയാണ്‌. കടുത്ത പനി ബാധിച്ച്‌ എത്തുന്നവരെ പോലും സ്വകാര്യ ആശുപത്രികള്‍ കിടക്കാന്‍ ഇടമില്ലാത്തതിനാല്‍ മടക്കി അയയ്‌ക്കുകയാണ്‌. എന്നാല്‍, സര്‍ക്കാര്‍ ആശുപത്രികളില്‍ സ്‌ഥിതി വ്യത്യസ്‌തമാണ്‌, ഇടമില്ലെന്ന്‌ അധികൃതര്‍ പറഞ്ഞാലും വരാന്തയില്‍ പോലും കിടക്കാന്‍ രോഗികള്‍ തയാറാകുന്ന കാഴ്‌ചയാണ്‌ .

ജില്ലയില്‍ രണ്ടു പേര്‍ക്കു മലേറിയ കൂടി സ്‌ഥിരീകരിച്ചതോടെ ജനം ആശങ്കയിലാണ്‌. ഇതര സംസ്‌ഥാനത്തു നിന്ന്‌ എത്തിയവര്‍ക്കാണു പനി റിപ്പോര്‍ട്ട്‌ ചെയ്‌തത്‌. ഇവരെ നിരീക്ഷിച്ചു വരുന്നതായും ആരോഗ്യവകുപ്പ്‌ പറഞ്ഞു. അതേ സമയം ഒരാള്‍ക്കു കൂടി എച്ച്‌1എന്‍1 റിപ്പോര്‍ട്ടു ചെയ്‌തിട്ടുണ്ട്‌. കൂടാതെ അഞ്ചു പേര്‍ക്കും ഡെങ്കിയും സ്‌ഥിതീകരിച്ചു.