മെട്രോയില്‍ ജോലി നല്‍കാമെന്ന് പറഞ്ഞ് സര്‍ക്കാര്‍ തങ്ങളെ വഞ്ചിച്ചുവെന്ന്‌ ട്രാന്‍സ്‌ജെന്‍ഡേഴ്‌സ്

മെട്രോയില്‍ ജോലി നല്‍കുമെന്ന് വാഗ്ദാനം ചെയ്ത് സര്‍ക്കാരും കെഎംആര്‍എല്ലും കബളിപ്പിച്ചെന്ന പരാതിയുമായി ട്രാന്‍സ്‌ജെന്‍ഡേഴ്‌സ് രംഗത്ത്‌. ജോലിക്കു മുന്‍പായുള്ള പരിശീലനത്തില്‍ പങ്കെടുപ്പിച്ച ശേഷം ഒഴിവാക്കുകയായിരുന്നുവെന്ന്‌ ആതിര(47) ശാന്തി (52) എന്നിവര്‍ ആരോപിച്ചു. 23 പേര്‍ക്ക് ജോലി നല്‍കുമെന്ന് പറഞ്ഞിട്ട് 12 പേര്‍ക്ക് മാത്രമാണ് ജോലി നല്‍കിയത്. മറ്റുള്ളവരെ പരിഹസിക്കുകയായിരുന്നെന്നും ഇവര്‍ വാര്‍ത്താ സമ്മേളനത്തില്‍ പറഞ്ഞു.

ഇത് സംബന്ധിച്ച് അസിസ്റ്റന്റ് കമ്മീഷണര്‍ക്ക് പരാതി നല്‍കിയെങ്കിലും ജോലി ഉറപ്പാക്കാമെന്ന വാക്കു മാത്രമേ ലഭിച്ചുള്ളൂ. മെട്രോയുടെ ഉദ്ഘാടനം കഴിഞ്ഞിട്ടും യാതൊരു പോസ്റ്റിലും തങ്ങളെ നിയമിച്ചിട്ടില്ല. മെട്രോയിലെ ജോലി പ്രതീക്ഷിച്ച് നേരത്തേ ചെയ്തു കൊണ്ടിരുന്ന ജോലി ഉപേക്ഷിച്ചു.

അതിനു ശേഷമായിരുന്നു രാജഗിരി കോളേജില്‍ വെച്ച് ഒരു മാസത്തെ പരിശീലനത്തില്‍ പങ്കെടുത്തത്. പരിശീലന സമയത്ത് പ്രായവും വിദ്യാഭ്യാസ യോഗ്യതയും ഒരു പ്രശ്‌നമായി പറഞ്ഞിരുന്നില്ലെന്നും ഇപ്പോള്‍ ഒരു ജോലിയും ഇല്ലാത്ത അവസ്ഥയാണെന്നും ഇവര്‍ പറഞ്ഞു. എന്നാല്‍ ആദ്യ ഘട്ടത്തിന് ശേഷം നിശ്ചിത വിദ്യാഭ്യാസ യോഗ്യത ഇല്ലെന്ന് കണ്ടെത്തിയതിനാലാണ് രണ്ടു പേരെ ഒഴിവാക്കിയതെന്ന് കെഎംആര്‍എല്‍ പറഞ്ഞു.