ഉത്തര കൊറിയ 17 മാസം തടവില്‍ പാര്‍പ്പിച്ച യുഎസ് പൗരന്‍ മരണത്തിന് കീഴടങ്ങി

മോഷണ കുറ്റം ആരോപിച്ച് ഉത്തര കൊറിയ 17 മാസം തടവില്‍ പാര്‍പ്പിച്ച യുഎസ് പൗരന്‍ ഓട്ടോ വാര്‍മ്പയര്‍ മരണത്തിന് കീഴടങ്ങി. ബാനര്‍ മോഷ്ടിക്കാന്‍ ശ്രമിച്ചു എന്ന കുറ്റം ആരോപിച്ചാണ് 22 വയസ്സുകാരനായ ഓട്ടോയെ ഉത്തര കൊറിയ തടവില്‍ പാര്‍പ്പിച്ചത്. പഠനത്തിന്റെ ഭാഗമായുള്ള യാത്രയ്ക്കായി ഇവിടെയെത്തിയ ഓട്ടോയ്ക്ക് 15 വര്‍ഷം കഠിന ജോലി എന്ന ശിക്ഷയാണ് കോടതി വിധിച്ചത്.

പ്രസിഡന്റ് ഡൊണാള്‍ഡ് ട്രംപും മെലാനിയയും മരണത്തില്‍ അനുശോചനം രേഖപ്പെടുത്തി. വഴിയരികിലെ ബാനര്‍ വിഷയത്തെ ചൊല്ലി ഓട്ടോയെ മരണത്തിലേയ്ക്ക് തള്ളി വിട്ട കൊറിയയുമായുള്ള അമേരിക്കന്‍ ബന്ധം കൂടുതല്‍ വഷളായി. തന്നെ രക്ഷിക്കണമെന്നും തെറ്റൊന്നും ചെയ്തിട്ടില്ലെന്നും വെളിപ്പെടുത്തി ഓട്ടോ നടത്തിയ പത്ര സമ്മേളനം ലോക മനസാക്ഷിയെ ഉലച്ചിരുന്നു. രക്ഷപ്പെടുത്താനുള്ള എല്ലാ ശ്രമവും യുഎസ് നടത്തിയെങ്കിലും കിം ഭരണകൂടം തയ്യാറായില്ല.

ഭക്ഷണവും വിശ്രമവും ഇല്ലാതെ മര്‍ദ്ദിച്ച് കഠിന ജോലികള്‍ ചെയ്യിച്ചതോടെ വിദ്യാര്‍ത്ഥി കോമയിലായി. ഇതോടെ മാനുഷിക പരിഗണന എന്ന പേരില്‍ ചലനമറ്റ ശരീരം ഒരാഴ്ച മുന്‍പ് അമേരിക്കയ്ക്ക് കൈമാറുകയായിരുന്നു. വിദഗ്ദ ചികിത്സകള്‍ നല്‍കിയെങ്കിലും ഓട്ടോ മരണത്തിന് കീഴടങ്ങി.