വിനോദസഞ്ചാരത്തിനായി മലബാറിന്റെ മുഖം മിനുക്കും

സര്‍ക്കാര്‍ ഏതാനും മാസങ്ങള്‍ക്കകം പുതിയ വിനോദസഞ്ചാരനയത്തിനും രൂപംനല്‍കും. ഇതിന്റെ ഭാഗമായി വടക്കന്‍ കേരളത്തിലെ മികച്ച വിനോദസഞ്ചാരകേന്ദ്രങ്ങളിലേക്കു വിദേശ വിനോദസഞ്ചാരികളെ എത്തിക്കാനുള്ള പദ്ധതികള്‍ ആവിഷ്‌ക്കരിക്കും. ഇതിനുള്ള കരട്‌ തയാറായി. സാഹസിക വിനോദസഞ്ചാരത്തിനു കേരളത്തില്‍ മികച്ച സാധ്യത ഉണ്ടെന്നാണ്‌ വിലയിരുത്തല്‍. യുവാക്കളായ വിനോദസഞ്ചാരികളെയാണ്‌ ഇതിലൂടെ ലക്ഷ്യംവയ്‌ക്കുന്നത്‌. പതിറ്റാണ്ടുകളായി കേരളത്തിന്റെ വിനോദസഞ്ചാര രംഗത്ത്‌ പേരെടുത്ത ആയുര്‍വേദ ടൂറിസവും കായല്‍ ടൂറിസവും മാത്രമല്ല ഇനിയുള്ള വര്‍ഷങ്ങളില്‍ വേണ്ടതെന്നാണ്‌ കരട്‌ രേഖയില്‍ വ്യക്‌തമാക്കുന്നു.

തെക്കന്‍ കേരളത്തിലെ വിനോദസഞ്ചാര കേന്ദ്രങ്ങളെ കൂടുതല്‍ ആശ്രയിക്കുന്ന രീതി മാറ്റി സംസ്‌ഥാനത്തിന്റെ വടക്കുഭാഗത്തുള്ള പ്രധാന വിനോദസഞ്ചാര ആകര്‍ഷണ കേന്ദ്രങ്ങളെ കൂടുതല്‍ സജീവമാക്കും. മൂന്നാറും കുമരകവും കൊച്ചിയുമടങ്ങുന്ന ദക്ഷിണമേഖല വിനോദസഞ്ചാര കേന്ദ്രങ്ങള്‍ക്ക്‌ കിട്ടുന്ന പ്രാധാന്യം മലബാര്‍ മേഖലയ്‌ക്കും കിട്ടുംവിധമായിരിക്കും പുതിയ വിനോദസഞ്ചാരനയം. കോഴിക്കോട്‌, വയനാട്‌, കണ്ണൂര്‍ ജില്ലകളിലെ പ്രധാന വിനോദ സഞ്ചാര കേന്ദ്രങ്ങളെ വിദേശികള്‍ക്കു പരിചയപ്പെടുത്തുന്ന പാക്കേജുകള്‍ ആവിഷ്‌ക്കരിക്കും. അഞ്ചു വര്‍ഷത്തിനകം ഇരട്ടി വിനോദസഞ്ചാരികള്‍ എന്നതാണു നയത്തിന്റെ അടിസ്‌ഥാനം.