എല്ലാം അഭിനയം : ആ മണല്‍കുഴിയില്‍ വീണ് ഷാരൂഖ് നേടിയത് കോടികള്‍..!

സോഷ്യല്‍ മീഡിയയില്‍ ഇപ്പോള്‍ ഏറെ വൈറലായിരിക്കുന്ന ഒരു വീഡിയോയാണ് ഷാരൂഖ് ഖാന്‍ ഒരു ടിവി അവതാരകനോട് രൂക്ഷമായ ഭാഷയില്‍ പ്രതികരിക്കുന്നത്. ഈജിപ്ഷ്യന്‍ റിയാലിറ്റി ഷോ ചിത്രീകരണത്തിനിടെ ഉണ്ടായ അപ്രതീക്ഷിത സംഭവത്തില്‍ ഷാരുഖ് ഖാന്‍ അവതാരകനെതിരെ രൂക്ഷമായി പ്രതികരിക്കുകയും കൈകാര്യം ചെയ്യുകയും ചെയ്യുന്ന വീഡിയോ ആയിരുന്നു അത്.

'റമീസ് അണ്ടര്‍ഗ്രൗണ്ട്' എന്ന സൂപ്പര്‍ ഹിറ്റ് റിയാലിറ്റി ഷോയിലായിരുന്നു സംഭവം. ഷാരുഖും മറ്റൊരു സ്ത്രീയും മണല്‍ കുഴിയില്‍പ്പെടുന്നതും ഡ്രാഗണ്‍ ആക്രമിക്കാന്‍ വരുന്നതുമായിരുന്നു രംഗം. സംഭവം അതിരു കടന്നതോടെ ഷാരുഖ് അവതാരകനെ തല്ലാന്‍ പോകുന്നതും വീഡിയോയില്‍ ഉണ്ടായിരുന്നു.

എന്നാലിപ്പോള്‍ ഇതുവെറും അഭിനയമായിരുന്നെന്നാണ് വെളിപ്പെടുത്തല്‍. അറബി പ്രസിദ്ധീകരണം പുറത്ത് വിട്ട റിപ്പോര്‍ട്ട് പ്രകാരം ഇതില്‍ അഭിനയിക്കാന്‍ ഷാരുഖിന് 2.57 കോടി രൂപ നല്‍കിയെന്നാണ് സൂചന. 59 ലക്ഷം പേര്‍ വീഡിയോ കണ്ടു കഴിഞ്ഞു. സംഭവം നേരത്തേ തയ്യാറാക്കപ്പെട്ട തിരക്കഥയാണെന്ന് ഷാരുഖിന്റെ മാനേജര്‍ പൂജ ദദ്‌ലാനിയും സമ്മതിച്ചു. എന്നാല്‍ ഷാരുഖിന് ലഭിച്ച പ്രതിഫലത്തെക്കുറിച്ച് പൂജ മൗനം പാലിക്കുകയായിരുന്നു.