അഞ്ചേരി ബേബി വധക്കേസ്: എം.എം മണി നേരിട്ട് ഹാജരാകണം

അഞ്ചേരി ബേബി വധക്കേസ് ജൂണ്‍ ഏഴിന് പരിഗണിക്കുമെന്ന് തൊടുപുഴ അഡീഷണല്‍ സെഷന്‍സ് കോടതി. കേസില്‍ പ്രതിയായ മന്ത്രി എം.എം മണി അടക്കമുള്ള മുഴുവന്‍ പ്രതികളും ഹാജരാകണമെന്നും കോടതി നിര്‍ദേശിച്ചു. യൂത്ത് കോണ്‍ഗ്രസ് ഉടുമ്പഞ്ചോല ബ്ലോക്ക് സെക്രട്ടറിയും ഐ.എന്‍.ടി.യു.സി മണ്ഡലം പ്രസിഡന്റുമായിരുന്ന അഞ്ചേരി ബേബി 1982 നവംബര്‍ 13നാണ് കൊല്ലപ്പെട്ടത്. തൊഴില്‍ തര്‍ക്കം പരിഹരിക്കാനെന്ന വ്യാജേന വിളിച്ചുവരുത്തിയശേഷം വെടിവച്ച് കൊലപ്പെടുത്തുകയായിരുന്നു.

സി.പി.എം നേതാക്കളായ എം.എം മണി, കെ.കെ ജയചന്ദ്രന്‍, ഒ.ജി മദനന്‍, എ.കെ ദാമോദരന്‍, വി.എം ജോസഫ് എന്നിവര്‍ക്കെതിരെയാണ് കേസെടുത്തത്. 2012 മേയ്25ന് തൊടുപുഴ മണക്കാട് മണി നടത്തിയ വിവാദ പ്രസംഗത്തിനിടെയാണ് അഞ്ചേരി ബേബി, മുള്ളന്‍ചിറ മത്തായി, മുട്ടുകാട് നാണപ്പന്‍ എന്നിവരെ കൊലപ്പെടുത്തിയതാണെന്ന വെളിപ്പെടുത്തല്‍ നടത്തിയത്.