ഇനി സ്ത്രീകള്‍ക്ക് ധൈര്യമായി യാത്ര ചെയ്യാം ; വരുന്നു ഷീ ലോഡ്ജുകള്‍

യാത്ര ചെയ്യുക എന്നത് ഏതൊരാള്‍ക്കും സന്തോഷം ഉളവാക്കുന്ന ഒന്നാണ്. അത് സ്ത്രീ ആയാലും പുരുഷനായാലും. പക്ഷെ രാത്രികാലങ്ങളിലെ യാത്ര സ്ത്രീകള്‍ക്ക് എപ്പോഴും വിലക്ക് ഏര്‍പ്പെടുത്തിയിരിക്കുകയാണ്. അതിന് കാരണം താമസ്സം സൗകര്യം തന്നെയാണ്. സഞ്ചരിക്കാന്‍ ഏറെ ഇഷ്ടപ്പെടുന്ന കേരളത്തിലെ സ്ത്രീകള്‍ക്ക് സന്തോഷം പകരുന്ന വാര്‍ത്തയാണ് ഇപ്പോള്‍ പുറത്ത് വരുന്നത്. ഷീ ടാക്‌സികള്‍ പോലെ ഷീ ലോഡ്ജുകളും വരുന്നു. കോര്‍പ്പറേഷനുകളിലും വലിയ നഗരസഭകളിലുമാകും തുടക്കത്തില്‍ ഇവ സ്ഥാപിക്കുക. രാത്രിയും പകലും സുരക്ഷിതമായി താമസിക്കാനും ഭക്ഷണ സൗകര്യവും ഉള്ളതാണ് ഷീ ലോഡ്ജുകള്‍.

വിശ്വസ്തതയുള്ള ഏജന്‍സിയുടെ നേതൃത്വത്തില്‍ ഷീ ലോഡ്ജ് ശൃംഘലകള്‍ സ്ഥാപിക്കാനാണ് തദ്ദേശ സ്വയംഭരണ സ്ഥാപനങ്ങള്‍ക്കുള്ള മാര്‍ഗ്ഗ നിര്‍ദ്ദേശം. സ്ത്രീ സൗഹൃദമായി ഇവ നടത്താന്‍ വനിത ഗ്രൂപ്പുകളെ ചുമതലപ്പെടുത്തും. നഗരസഭയ്ക്ക് സ്വന്തമായുളള കെട്ടിടത്തിലോ വാടകയ്‌ക്കോ ഇവ തുടങ്ങാം. ഓണ്‍ലൈന്‍ ബുക്കിങിലൂടെയും മുറി ഉപയോഗിക്കാം.