ഇത് ഗംഭീരമല്ല…അതുക്കും മേലെ….!!

സിനിമയെ സ്‌നേഹിക്കുന്ന ഏതൊരാളും കാണാന്‍ കാത്തിരുന്ന ചിത്രമാണ് രാജമൗലിയുടെ ബാഹുബലി 2. എന്നാല്‍ ഇന്ന് ആ കാത്തിരിപ്പിന് വിരാമം ആയിരിക്കുകയാണ്. ഇന്ത്യയില്‍ മാത്രം 6500 റിലീസിങ് സെന്ററുകളാണ് ഒരുക്കിയിരിക്കുന്നത്. ചിത്രത്തിന് കേരളത്തിലും വന്‍ വരവേല്‍പ്പാണ് കിട്ടിയിരിക്കുന്നത്. കേരളത്തില്‍ മാത്രം 300 സെന്ററുകളിലായി 1000 ഷോകളാണ് ഉള്ളത്. ആദ്യത്തെ ഷോയ്ക്ക് ഗംഭീരവരവേല്‍പ്പാണ് കേരളം നല്‍കിയിരിക്കുന്നത്. ഇന്ന് രാവിലെ ആറ് മണിക്കായിരുന്നു ആദ്യ ഷോ. ആദ്യ ഷോയ്ക്കായി വെളുപ്പിനെ മുതല്‍ ആളുകള്‍ ക്യു ആയിരുന്നു.

ബോക്സ് ഓഫീസിന്റെ കാര്യത്തിൽ ഏകദേശം തീരുമാനമായെന്ന് ഉറപ്പിക്കാം. ഇന്ത്യന്‍ സിനിമാ ചരിത്രത്തിലെ ഒരു ഇതിഹാസമാണ് ബാഹുബലി. ഈ സിനിമയെ വിശേഷിപ്പിക്കാന്‍ മറ്റുപദങ്ങള്‍ക്കൊന്നും കരുത്ത് പോരാതെ വരും. ആദ്യ ചിത്രത്തിന്റെ ഇഫക്ടിൽ തന്നെ രണ്ടാം ചിത്രവും എടുക്കുക എന്നത് ഒരു സംവിധായകനെ സംബന്ധിച്ച് അത്ര എളുപ്പമുള്ള പണി അല്ല. എന്നാൽ, എസ് എസ് രാജമൗലി എന്ന ഇന്ത്യൻ സംവിധായകൻ ഇപ്പോൾ ലോകനെറുകയിൽ ആണ്. അപാരം തന്നെയാണ് ഈ സംവിധായകൻ എന്ന് സിനിമ കണ്ടിറങ്ങുന്നവർ ഒന്നടങ്കം പറയുന്നു. പ്രതീക്ഷയോടെ വരുന്നവരെ മാത്രമല്ല, അമിത പ്രതീക്ഷയോടെ വരുന്നവരേയും പിടിച്ചിരുത്തുന്ന ചിത്രമാണ് ബാഹുബലി 2 എന്ന് പറയാതെ വയ്യ.

ഗള്‍ഫില്‍ ഇന്നലെ വൈകിട്ട് തന്നെ ചിത്രം റിലീസ് ആയി. അതുകൊണ്ട് തന്നെ ചിത്രം ആദ്യം കണ്ടതും ഗള്‍ഫ് പ്രേക്ഷകരാണ്. അമരേന്ദ്ര ബാഹുബലിയുടെയും ദേവസേനയുടെയും കഥയാണ് ചിത്രത്തിന്റെ രണ്ടാം ഭാഗത്ത് പറയുന്നത്. ചിത്രം കണ്ടിറങ്ങിയ പ്രേക്ഷകര്‍ പറയുന്നത് ഒന്നാം ഭാഗത്തേക്കാള്‍ മികച്ചപ്രകടനമാണ് രണ്ടാം ഭാഗത്ത് കാണാന്‍ കഴിയുന്നതെന്നാണ്. ഇന്ത്യന്‍ സിനിമ ചരിത്രത്തില്‍ സുവര്‍ണ്ണ ലിപികളില്‍ ഈ ചിത്രം രേഖപ്പെടുത്തും എന്നതില്‍ ഒട്ടും സംശയമില്ലെന്നാണ് ബാഹുബലിയേയും ദേവസേനയേയും ശിവകാമിയേയും കട്ടപ്പയേയുമൊക്കെ കണ്ടിറങ്ങിയ പ്രേക്ഷക ലക്ഷങ്ങള്‍ ഒരേ സ്വരത്തില്‍ പറയുന്നത്.