വിനോദ് ഖന്ന അന്തരിച്ചു

ബോളിവുഡ് നടനും മുന്‍കേന്ദ്രമന്ത്രിയുമായ വിനോദ് ഖന്ന അന്തരിച്ചു. 70 വയസ്സായിരുന്നു. അര്‍ബുദരോഗത്തെ തുടര്‍ന്ന് എറെനാള്‍ ചികിത്സയില്‍ ആയിരുന്നു. നിലവില്‍ പഞ്ചാബിലെ ഗുര്‍ദാസ്പുരില്‍ നിന്നുമുള്ള ബിജെപി എം.പിയാണ്.

പേഷ് വാറിലാണ് വിനോദ് ഖന്ന ജനിച്ചത്. പിന്നീട് കുടുംബത്തോടൊപ്പം ഇന്ത്യയിലേക്ക് കുടിയേറുകയായിരുന്നു. 1968 ല്‍ പുറത്തിറങ്ങിയ അധ്രുതി സുബ്ബ റാവു സംവിധാനം ചെയ്ത സുനില്‍ ദത്തിന്റെ മന്‍ ക മീത്തില്‍ വില്ലനായിട്ടായിരുന്നു അദ്ദേഹത്തിന്റെ അരങ്ങേറ്റം. 2015ല്‍ പുറത്തിറങ്ങിയ ദില്‍വാലെയാണ് അദ്ദേഹം അവസാനം അഭിനയിച്ച ചിത്രം. 1968 മുതല്‍ 2013 വരെ ചലച്ചിത്ര ലോകത്ത് സജീവമായിരുന്ന ഖന്ന 141 സിനിമകളില്‍ അഭിനയിച്ചിട്ടുണ്ട്. മേരെ അപ്‌നെ, മേര ഗാവോ മേര ദേഷ്, ഗദ്ദാര്‍, ജെയില്‍ യാത്ര, ഇമിത്തിഹാന്‍, ഇന്‍കാര്‍ , കുച്ചെ ദാഗെ, അമര്‍ അക്ബര്‍ ആന്റണി, രജ്പുത്, കുര്‍ബാനി, കുദ്രത്, ദയാവന്‍, കാര്‍നാമ, സൂര്യ, ആ അവേക്ക്‌നിംഗ്, ജൂറം തുടങ്ങി നിരവധി ഹിറ്റ് ചിത്രങ്ങളില്‍ സുപ്രധാന റോളുകളില്‍ അഭിനയിച്ചിട്ടുണ്ട്. കുറച്ചുകാലം സിനിമയില്‍ നിന്ന് വിട്ടുനിന്ന അദ്ദേഹം അഞ്ചു വര്‍ഷത്തിനു ശേഷം ഇന്‍സാഫ്, സത്യവേമ ജയതേ എന്നീ ചിത്രങ്ങളിലൂടെ ബോളിവുഡിലേക്ക് ശക്തമായ തിരിച്ചുവരവ് നടത്തി.

1997ല്‍ ബി.ജെ.പിയില്‍ ചേര്‍ന്ന ഖന്ന, ഗുര്‍ദാസ്പുര്‍ മണ്ഡലത്തില്‍ നിന്ന് 1999ല്‍ ലോക്‌സഭയില്‍ എത്തി. 2002ല്‍ കേന്ദ്ര ടൂറിസം സാംസ്‌കാരിക മന്ത്രിയുമായിരുന്നു. ആറു മാസത്തിനു ശേഷം വിദേശകാര്യ സഹമന്ത്രിയായി. 2009ലെ തെരഞ്ഞെടുപ്പില്‍ പരാജയം നേരിട്ടുവെങ്കിലും 2014ല്‍ വീണ്ടും പാര്‍ലമെന്റില്‍ എത്തി. കവിതയാണ് ഭാര്യ. നടന്‍ അക്ഷയ് ഖന്ന, രാഹുല്‍ ഖന്ന, സാക്ഷി ഖന്ന, ശ്രദ്ധ ഖന്ന എന്നിവരാണ് മക്കള്‍.