യു.ഡി.എഫിലേക്കുള്ള ക്ഷണം തള്ളി കെ.എം മാണി

യു.ഡി.എഫിലേക്കുള്ള ക്ഷണം തള്ളി കെ.എം മാണി രംഗത്ത്. ചരല്‍ക്കുന്ന് ക്യാമ്പിലെ തീരുമാനത്തില്‍ മാറ്റമില്ലെന്നും ആ തീരുമാനം മാറ്റേണ്ട സാഹചര്യം ഇപ്പോഴില്ലെന്നും മാണി വ്യക്തമാക്കി. തനിക്ക് ആരോടും വിരോധമോ സൗഹൃദമോ ഇല്ലെന്നും കേരളാ കോണ്‍ഗ്രസിന്റെ നിലപാടുകള്‍ താന്‍ മലപ്പുറത്തും വ്യക്തമാക്കിയതാണെന്നും മാണി കൂട്ടിച്ചേര്‍ത്തു.

കെ.എം മാണി യു.ഡി.എഫിലേയ്ക്ക് തിരിച്ചു വരണമെന്നും വെള്ളിയാഴ്ച ചേരുന്ന യു.ഡി.എഫ് യോഗത്തില്‍ ഇക്കാര്യം ചര്‍ച്ച ചെയ്യുമെന്നും കെ.പി.സി.സി പ്രസിഡന്റ് എം.എം ഹസ്സന്‍ ഇന്നു രാവിലെ വ്യക്തമാക്കിയിരുന്നു. മാണിയുടെ പിന്തുണ മലപ്പുറത്ത് ഗുണം ചെയ്തുവെന്നും അദ്ദേഹം ലീഗിനെയാണ് പിന്തുണച്ചത് എങ്കിലും ഗുണം ലഭിച്ചത് യു.ഡി.എഫിനാണെന്നും ഹസ്സന്‍ പറഞ്ഞിരുന്നു. ഇതിനുള്ള മറുപടിയായാണ് യു.ഡി.എഫിലേയ്ക്ക് ഒരു തിരിച്ചു വരവിനെ കുറിച്ച് ചിന്തിക്കുന്നില്ലെന്ന് മാണി വ്യക്തമാക്കിയിരിക്കുന്നത്.