മുഖ്യമന്ത്രിയെ ട്രോളിയാല്‍ ഉഗ്രന്‍ പണി കിട്ടും

മുഖ്യമന്ത്രി പിണറായി വിജയനെ സാമൂഹ്യ മാധ്യമത്തില്‍ ട്രോളിയാല്‍ ഹൈടെക് സെല്ലിന്റെ വക ഉഗ്രന്‍ പണി കിട്ടും.ഇതു സംബന്ധിച്ച് ട്രോള്‍ ഗ്രൂപ്പുകളിലെ അഡ്മിന്‍ കൈകാര്യം ചെയ്യുന്നവര്‍ക്ക് നിര്‍ദ്ദേശം നല്‍കി കഴിഞ്ഞു.ലംഘിച്ചാല്‍ ഐടി നിയമപ്രകാരം കേസെടുക്കും. സാമൂഹ്യ മാധ്യമങ്ങളില്‍ സര്‍ക്കാര്‍ കാര്യങ്ങളില്‍ അഭിപ്രായം പറയുന്നത് സര്‍ക്കാര്‍ ജീവനക്കാര്‍ക്ക് സര്‍ക്കുലര്‍ നല്‍കിയ ഉടനെയാണ് അടുത്ത നീക്കം.മുഖ്യമന്ത്രിയെ വിമര്‍ശിക്കുന്ന തരത്തില്‍ സാമൂഹ്യമാധ്യമത്തില്‍ പ്രചരിക്കുന്ന ട്രോളുകള്‍ക്കെതിരെ ഒരു വ്യക്തി സമര്‍പ്പിച്ച പരാതിയുടെ അടിസ്ഥാനത്തിലാണ് നടപടിയെന്ന് ഹൈടെക് സെല്‍ വ്യക്തമാക്കുന്നു.എന്നാല്‍ പരാതി നല്‍കിയത് ആരാണെന്ന കാര്യത്തില്‍ വ്യക്തതയില്ല.മുഖ്യമന്ത്രിയെ വിമര്‍ശിക്കുന്ന തരത്തിലുള്ള പോസ്റ്റുകള്‍ ഉടന്‍ മാറ്റണമെന്നും നിര്‍ദ്ദേശത്തില്‍ പറയുന്നു.

സര്‍ക്കാര്‍ ജീവനക്കാര്‍ സാമൂഹ്യമാധ്യമങ്ങളില്‍ സര്‍ക്കാരിനെ വിമര്‍ശിക്കുന്നതിനെതിരെ ഇറങ്ങിയ സര്‍ക്കുലര്‍ പിന്‍വലിക്കണമെന്ന് സര്‍വ്വീസ് സംഘടനകള്‍ ആവശ്യപ്പെട്ടിട്ടുണ്ട്.

മുഖ്യമന്ത്രി പിണറായി വിജയനെയും പൊലീസിനെയും വെല്ലുവിളിച്ചാണ് പോസ്റ്റുകള്‍ പ്രചരിക്കുന്നത്. മുഖ്യമന്ത്രിയുടെ മംഗലാപുരം പ്രസംഗത്തിലെ പരാമര്‍ശവും സമീപകാലത്ത് പൊലീസ് വകുപ്പിന് പറ്റിയ വീഴ്ചകളെയും കളിയാക്കി നിരവധി ട്രോളുകളാണ് ഫേസ്ബുക്കടക്കമുള്ള സാമൂഹികമാധ്യമങ്ങളില്‍ പ്രചരിച്ചിരുന്നത്.

അതേസമയം സോഷ്യല്‍ മീഡിയ ഉപയോഗിക്കുന്നതിന് ഉദ്യോഗസ്ഥര്‍ക്ക് നിയന്ത്രണമേര്‍പ്പെടുത്തിയ സര്‍ക്കാര്‍ നടപടിക്കെതിരെ പ്രതിഷേധവുമായി സര്‍വീസ് സംഘടനകള്‍ രംഗത്തെത്തിയിട്ടുണ്ട്. നടപടി അഭിപ്രായ സ്വാതന്ത്ര്യത്തിനെതിരാണെന്ന് എന്‍.ജി.ഒ അസോസിയേഷന്‍ ആരോപിച്ചു. തീരുമാനം അടിച്ചേല്‍പ്പിക്കാന്‍ അനുവദിക്കില്ലെന്നും അസോസിയേഷന്‍ വ്യക്തമാക്കി.