ദുരൂഹ സാഹചര്യത്തില്‍ 14കാരന്‍ ആത്മഹത്യ ചെയ്ത സംഭവം : ഡിവൈഎസ്പി സമര്‍പ്പിച്ച റിപ്പോര്‍ട്ട് റൂറല്‍ എസ്പി തള്ളി

കുണ്ടറയില്‍ ദുരൂഹ സാഹചര്യത്തില്‍ 14കാരന്‍ ആത്മഹത്യ ചെയ്ത സംഭവത്തില്‍ കൊട്ടാരക്കര ഡിവൈഎസ്പി സമര്‍പ്പിച്ച റിപ്പോര്‍ട്ട് റൂറല്‍ എസ്പി തള്ളി. കേസില്‍ പുനരന്വേഷണം നടത്തേണ്ട സാഹചര്യമോ വിശദാംശങ്ങളോ ഇല്ലെന്നതാണ് റിപ്പോര്‍ട്ട് തള്ളാന്‍ കാരണം. ഉടന്‍ തന്നെ വിശദമായ റിപ്പോര്‍ട്ട് സമര്‍പ്പിക്കാനും ഡിവൈഎസ്പിയോട് ആവശ്യപ്പെട്ടു. കുട്ടിയുടെ മരണം ആദ്യം അന്വേഷിച്ച് ആത്മഹത്യ തന്നെയാണെന്ന റിപ്പോര്‍ട്ട് സമര്‍പ്പിച്ച ഡിവൈഎസ്പിയാണിത്.

കുണ്ടറയില്‍ കൊച്ചു മകളെ പീഡിപ്പിച്ച വിക്ടര്‍ കുട്ടിയുടെ മരണത്തിന് കാരണമായിട്ടുണ്ടെന്ന് സൂചന ലഭിച്ചതോടെയാണ് കേസില്‍ പുനരന്വേഷണം ആരംഭിച്ചത്. മരിച്ച 14കാരന്റെ പെങ്ങളെ വിക്ടര്‍ പീഡിപ്പിക്കുമെന്ന് ഭീഷണിപ്പെടുത്തിയിരുന്നു. കുട്ടി മരിച്ച ദിവസം വീട്ടില്‍ ആരും ഇല്ലായിരുന്നു. തിരിച്ചു വന്നപ്പോള്‍ മരിച്ച നിലയില്‍ കണ്ടെത്തുകയായിരുന്നു. മരണത്തിനു ശേഷം വിക്ടര്‍ വീട്ടിലേയ്ക്ക് വിളിച്ച് ഭീഷണിപ്പെടുത്തിയിരുന്നതായും കുടുംബം പറയുന്നു. പിന്നീട് ഈ കുടുംബം ഇവിടെ നിന്ന് മാറുകയായിരുന്നു.