വിടരും മുമ്പേ കൊഴിഞ്ഞു പോയ ‘കുട്ടികള്‍ക്ക് കണ്ണീരോടെ’,മോഹന്‍ലാലിന്റെ പുതിയ ബ്ലോഗ്

കുട്ടികള്‍ക്കു നേരേ നടക്കുന്ന പീഡനങ്ങള്‍ ഉള്‍പ്പടെയുള്ള അതിക്രമങ്ങള്‍ക്കെതിരെ കണ്ണീരോടെ ബ്ലോഗ് കുറിച്ച് മോഹന്‍ലാല്‍.'വിദൂരത്തല്ല,തൊട്ടരികില്‍ നമ്മുടെ കണ്ണും കാതുമെത്തുന്നിടത്ത് കുട്ടികള്‍ പീഡിപ്പിക്കപ്പെടുന്നു,ചില കുട്ടികള്‍ ആ സമ്മര്‍ദ്ദം താങ്ങാനാവാതെ ആത്മഹത്യ ചെയ്യുന്നു,എന്തൊരു ലോകമാണിത്',നടന്‍ കുറിച്ചു.

ബ്ലോഗിന്റെ പ്രസക്ത ഭാഗങ്ങള്‍

കൈലാഷ് സത്യാര്‍ത്ഥിയ്ക്ക് നോബല്‍ സമ്മാനം ലഭിച്ചത് പീഡനങ്ങള്‍ക്കിരയായ കുട്ടികള്‍ക്കു വേണ്ടി ചെയ്ത പ്രവര്‍ത്തനങ്ങളെ മാനിച്ചാണ്.അന്ന് ആ പത്രവാര്‍ത്ത വായിച്ചപ്പോള്‍ എന്താണ് കുട്ടികള്‍ക്കു വേണ്ടി ഇത്രമാത്രം ചെയ്യാനുള്ളതെന്ന് ഞാന്‍ മനസുകൊണ്ട്കരുതിയിരുന്നു.എന്നാല്‍ ഇപ്പോള്‍ കേരളത്തില്‍ ജീവിക്കുമ്പോള്‍ മനസിലാകുന്നു കുട്ടികള്‍ക്കു വേണ്ടിയാണ് നമുക്ക് ഏറെ ചെയ്യാനുള്ളത്.കാരണം ഏറ്റവുമധികം സഹിക്കുന്നത് അവരാണ്.

കഴിഞ്ഞ ഒരു മാസത്തെ വാര്‍ത്തകള്‍ എടുത്തു നോക്കൂ.പല തരത്തില്‍ പീഡിപ്പിക്കപ്പെടുന്ന കുട്ടികള്‍,ആത്മഹത്യ ചെയ്യുന്ന കുട്ടികള്‍,ഉപേക്ഷിക്കപ്പെടുന്ന കുട്ടികള്‍ ,കൊലചെയ്യപ്പെടുന്ന കുട്ടികള്‍ .എത്രയെത്ര സംഭവങ്ങളാണ് നാം കണ്ടതും കേട്ടതും.എല്ലാം ഏതോ വിദൂര ദേശത്തേ കഥയല്ല.ഇതെല്ലാം സംഭവിച്ചത് നമ്മുടെ ചുറ്റുവട്ടത്തിലാണ്.നമ്മുടെ അയല്‍പക്കങ്ങളിലും കണ്ണും കാതും എത്തുന്ന ദൂരത്തുമാണ്.മൂന്നു വയസും ആറും പത്തും വയസായ കുട്ടികള്‍ പീഡിപ്പിക്കപ്പെടുന്നു.അതിന്റെ സമ്മര്‍ദ്ദം താങ്ങാന്‍ കഴിയാതെ അവര്‍ തകര്‍ന്നു പോകുന്നു.ചിലര്‍ ആത്മഹത്യ ചെയ്യുന്നു.ഇതെന്തൊരു ലോകമാണ്.

കുട്ടികള്‍ ആത്മഹത്യ ചെയ്തുകൊണ്ടിരിക്കുന്നത് എന്നത് എന്നെ ഏറ്റവുമധികം ഞെട്ടിച്ച കാര്യമാണ്.ആത്മഹത്യയ്ക്ക്പല കാരണങ്ങളാണ്.കുടുംബത്തില്‍ മുതല്‍ സ്‌കൂളുകളിലും കോളെജുകളിലും വരെ നടക്കുന്ന കാര്യങ്ങള്‍ അവരെ ഒരു മുഴം കയറിലേക്കും അല്പം വിഷത്തിലേക്കും പുഴയുടെ ആഴങ്ങളിലേക്കും പോകാന്‍ പ്രേരിപ്പിക്കുന്നു.പൂര്‍ണമായും വിടരും മുമ്പേ അങ്ങിനെ മരണത്തെ വരിച്ച എല്ലാ മുകുളങ്ങള്‍ക്കും എന്റെ കണ്ണീര്‍ പ്രണാമം.എന്താണ് നമുക്കും നമ്മുടെ കുട്ടികള്‍ക്കും പറ്റിയത് എന്ന ആലോചനയും എന്നില്‍ ഉയരുന്നു.

കുടുംബ പ്രശ്‌നങ്ങളും പഠന പ്രശ്‌നങ്ങളും സാമ്പത്തിക പ്രശ്‌നങ്ങളും ഇന്നു തുടങ്ങിയവയല്ല.എല്ലാക്കാലത്തും ഇവയെല്ലാം ഉണ്ടായിരുന്നു.പണ്ടും കുട്ടികള്‍ പരീക്ഷയില്‍ തോറ്റിരുന്നു.അധ്യാപകര്‍ കുട്ടികളെ അടിച്ചിരുന്നു.എന്നാല്‍ ആരും ആത്മഹത്യ ചെയ്തിരുന്നില്ല.അതിന്റെ കാരണമാണ് ഞാന്‍ പറയുന്നത്.അന്ന് വിദ്യാര്‍ത്ഥികള്‍ തോറ്റിരുന്നു.എന്നാല്‍ തോറ്റു എന്ന കാരണത്താല്‍ അവനെ അല്ലെങ്കില്‍ അവളെ വീട്ടില്‍ വെച്ചോ വിദ്യാഭ്യാസ സ്ഥാപനത്തില്‍ വെച്ചോ വാക്കുകള്‍ കൊണ്ടും ശാരീരികമായും പീഡനങ്ങള്‍ക്കിരയാക്കിയിരുന്നില്ല.പ്രോഗ്രസ് കാര്‍ഡ് കൊണ്ടു വരുമ്പോള്‍ അത് അച്ഛനോ അമ്മയോ കാണുമ്പോള്‍ അല്പനേരത്തേക്കുള്ള മുറുമുറുപ്പ് ,ഗുണദോഷിക്കല്‍ അതില്‍ കഴിഞ്ഞു എല്ലാം.പണ്ട് ചൂരലായിരുന്നെങ്കില്‍ ഇന്ന് ഇടിമുറിയായി.പണ്ട് ഗുണദോഷിക്കലാണെങ്കില്‍ ഇന്ന് എഴുതിത്തള്ളലായി.ഈ സമ്മര്‍ദ്ദങ്ങള്‍ സഹിക്കാന്‍ കഴിയാതെ വരുമ്പോഴാണ് നമ്മുടെ കുട്ടികള്‍ ആത്മഹത്യ ചെയ്യുന്നത്.

ബ്ലോഗിന്റെ പൂര്‍ണരൂപം