വരള്‍ച്ച നേരിടാന്‍ കൃത്രിമ മഴ ; മുഖ്യമന്ത്രിയുടെ ആശയത്തിന് പ്രതിപക്ഷത്തിന്റെ പിന്തുണ

കടുത്ത വരള്‍ച്ച നേരിടാന്‍ കൃത്രിമ മഴ പെയ്യിക്കുന്നതിനെക്കുറിച്ച് ആലോചിക്കുമെന്ന് മുഖ്യമന്ത്രി പിണറായി വിജയന്‍. നിയമസഭയിലാണ് വരള്‍ച്ച പരിഹാര മാര്‍ഗ്ഗമായി ക്ലൗഡ് സീഡിങ് എന്ന ആശയം മുഖ്യമന്ത്രി അവതരിപ്പിച്ചത്. വരള്‍ച്ച നേരിടാനുള്ള മാര്‍ഗ്ഗങ്ങള്‍ സര്‍ക്കാര്‍ സ്വീകരിച്ചിട്ടുണ്ടെന്നും അറിയിച്ചു. മുഖ്യമന്ത്രിയുടെ ആശയത്തിന് പ്രതിപക്ഷവും പിന്തുണ നല്‍കി. ആശയം കൃത്യമായ നടപ്പിലാകുകയാണെങ്കില്‍ പൂര്‍ണ്ണ പിന്തുണയുള്ളതായി പ്രതിപക്ഷ നേതാവ് രമേശ് ചെന്നിത്തല അറിയിച്ചു.

വരള്‍ച്ചയ്ക്ക് സര്‍ക്കാര്‍ അല്ല കാരണക്കാരെന്നും പിണറായി സഭയില്‍ പറഞ്ഞു. വരള്‍ച്ച നേരിടാനുള്ള നടപടികള്‍ കഴിഞ്ഞ ഒക്‌ടോബര്‍ മുതല്‍ ആരംഭിച്ചുവെന്ന് റവന്യൂ മന്ത്രി ഇ ചന്ദ്രശേഖരനും സഭയെ അറിയിച്ചു. സഭ നിര്‍ത്തിവെച്ച് വരള്‍ച്ചാ പ്രശ്‌നം ചര്‍ച്ച ചെയ്യണമെന്ന ഷാഫി പറമ്പില്‍ എംഎല്‍എ നല്‍കിയ അടിയന്തര പ്രമേയത്തിന് മറുപടിയായാണ് കൃത്രിമ മഴയ്ക്കായുള്ള നടപടികളെക്കുറിച്ച് കേന്ദ്രത്തോട് സംസാരിക്കുമെന്ന് മുഖ്യമന്ത്രി പറഞ്ഞത്.