നടി ആക്രമിക്കപ്പെട്ട സംഭവത്തില്‍ നിലപാട് തിരുത്തി മുഖ്യമന്ത്രി പിണറായി വിജയൻ

നടി ആക്രമിക്കപ്പെട്ട കേസില്‍ ഗൂഢാലോനയില്ലെന്ന് താന്‍ തറപ്പിച്ചു പറഞ്ഞിട്ടില്ലെന്നു മുഖ്യമന്ത്രി പിണറായി വിജയന്‍.സംഭവത്തില്‍ ഗൂഢാലോചനയില്ലെന്ന് താന്‍ പറഞ്ഞതായി ഒരു മാധ്യമത്തില്‍ വന്ന വാര്‍ത്തയെക്കുറിച്ച് വിശദീകരിക്കുകയായിരുന്നു അദ്ദേഹം.കാള പെറ്റന്നു കേട്ടയുടന്‍ പ്രതിപക്ഷ നേതാവ് രമേശ് ചെന്നിത്തല കയറെടുക്കുകയായിരുന്നു എന്നും പിണറായി പറഞ്ഞു. കഴിഞ്ഞ ദിവസം കൊച്ചിയില്‍ നടന്ന ഒരു പരിപാടിയിലാണ് നടിയുടെ ആക്രമണത്തിനു പിന്നില്‍ ഗൂഢാലോചനയില്ലെന്ന് മുഖ്യമന്ത്രി പറഞ്ഞതായി ഒരു മാധ്യമത്തില്‍ വാര്‍ത്ത വന്നത്.എന്നാല്‍ സംഭവത്തിനു പിന്നില്‍ ഗൂഢാലോചനയുണ്ടെന്ന് പൊലീസ് നിലപാട് വ്യക്തമാക്കുകയും ചെയ്തിരുന്നു.തുടര്‍ന്ന് ഇന്ന് ഈ സംഭവത്തെ കുറിച്ച് മുഖ്യമന്ത്രി മാധ്യമങ്ങളുടെ ചോദ്യത്തിന് വിശദീകരണം നല്കുകയായിരുന്നു.

എന്നാല്‍ ഗൂഢാലോചന സംബന്ധിച്ചും അന്വേഷണം സംബന്ധിച്ചും താന്‍ പറഞ്ഞിരുന്നതായി മുഖ്യമന്ത്രി വ്യക്തമാക്കി.ഇതു സംബന്ധിച്ച് തന്റെ മുന്നിലുണ്ടായിരുന്ന ഒരു പത്രത്തിലെ വാര്‍ത്ത വിശദീകരിക്കുകയാണ് ചെയ്തത്.അല്ലാതെ അന്വേഷണത്തിലിരിക്കുന്ന വിഷയത്തെ കുറിച്ച് താന്‍ പറഞ്ഞിട്ടില്ലെന്നും അദ്ദേഹം പറഞ്ഞു.