തിരിച്ചറിയല്‍ പരേഡ് പൂര്‍ത്തിയായി ,പ്രതികളെ നടി തിരിച്ചറിഞ്ഞു

നടിയെ ആക്രമിച്ച കേസില്‍ പ്രതികളുടെ തിരിച്ചറിയല്‍ പരേഡ് ആലുവ സബ്ജയിലില്‍ നടന്നു.നടി ആദ്യം പിടിയിലായ സലിം,മാര്‍ട്ടിന്‍,പ്രദീപ്,മണികണ്ഠന്‍ എന്നിവരെയാണ് തിരിച്ചറിഞ്ഞത്.ഒന്നാം ക്ലാസ് മജിസ്‌ട്രേറ്റിന്റെ സാനിധ്യത്തിലാണ് നടി പ്രതികളെ തിരിച്ചറിഞ്ഞത്.ഇവരെ മറ്റ് പ്രതികള്‍ക്കൊപ്പം ഇടകലര്‍ത്തി നിര്‍ത്തിയാണ് തിരിച്ചറിയല്‍ പരേഡ് നടത്തിയത്. തിരിച്ചറിയല്‍ പരേഡ് പ്രത്യേകം തയ്യാറാക്കിയ ജയില്‍ മുറിക്കുള്ളിലാണ് നടന്നത്.3.20 നാരംഭിച്ച തിരിച്ചറിയല്‍ പരേഡ് 4.50 വരെ തുടര്‍ന്നു.നടി ഈ പ്രതികളെ തിരിച്ചറിഞ്ഞത് കേസില്‍ നിര്‍ണായകമാകും.

കഴിഞ്ഞ ദിവസം കോടതിയില്‍ കീഴടങ്ങാനെത്തിയ മുഖ്യപ്രതി പള്‍സര്‍ സുനിയുടെയും വിജീഷിന്റെയും ഫോട്ടോകള്‍ വ്യാപകമായി പ്രചരിച്ച സാഹചര്യത്തില്‍ ഇവരെ തിരിച്ചറിയില്‍ പരേഡില്‍ നിന്ന് ഒഴിവാക്കിയിരുന്നു. തിരിച്ചറിയല്‍ പരേഡിന്റെ റിപ്പോര്‍ട് കേസ് പരിഗണിക്കുന്ന അങ്കമാലി ജുഡീഷ്യല്‍ മജിസ്‌ട്രേറ്റിനു നല്‍കും.ഇതിനിടയില്‍ കൂടുതല്‍ അന്വേഷണങ്ങള്‍ക്കും തെളിവെടുപ്പിനുമായി മുഖ്യപ്രതി സുനിയെയും വിജീഷിനെയും പൊലീസ് കസ്റ്റഡിയില്‍ വാങ്ങിച്ചിട്ടുണ്ട്.