മുംബൈ കോര്‍പ്പറേഷനില്‍ ബിജെപിയ്ക്കു നേട്ടം,ഒറ്റയ്ക്കു മല്‌സരിച്ചെങ്കിലും ശിവസേനയ്ക്കു തൊട്ടു പിന്നില്‍ രണ്ടാമത്

ബൃഹന്‍ മുംബൈ കോര്‍പറേഷനില്‍ കരുത്ത് തെളിയിച്ച് 82 സീറ്റുകളോടെ ബി ജെ പി രണ്ടാമതെത്തി.ശിവസേനയ്ക്ക് 84 സീറ്റുകളാണ് കോര്‍പ്പറേഷനില്‍ നേടാനായത്.2012 ല്‍ നേടിയതിന്റെ മൂന്നിരട്ടി സീറ്റുകളിലാണ് ഇത്തവണ ബിജെപി ഇവിടെ നേടിയിരിക്കുന്നത്.കോണ്‍ഗ്രസും എന്‍സിപിയും കോര്‍പറേഷനില്‍ തകര്‍ന്നടിഞ്ഞു.കോണ്‍ഗ്രസ്-31,എന്‍സിപി-8,എംഎന്‍എസ്-7,സ്വതന്ത്രര്‍-13 എന്നിങ്ങനെയാണ് സീറ്റു നില.എന്നാല്‍ കോര്‍പറേഷന്‍ ആരു ഭരിക്കും എന്ന കാര്യത്തില്‍ ഇതുവരെ തീരുമാനമായിട്ടില്ല.പുതിയ സഖ്യത്തെക്കുറിച്ച് ശിവസേനാ നേതാവ് ഉദ്ധവ് താക്കറെ മൗനം പാലിക്കുന്നു.ബി എം സി ഭരിക്കണമെങ്കില്‍ കേവല ഭൂരിപക്ഷമായ 114 എന്ന മാജിക് സംഖ്യയിലേക്കെത്തണം.

മഹാരാഷ്ട്രിയിലെ പത്തു കോര്‍പറേഷനുകളില്‍ എട്ടിടത്തും ബി ജെ പി അധികാരം ഉറപ്പിച്ചു.ചരിത്ര വിജയമെന്നാണ് ഫട്‌നാവിസ് ക്യാമ്പ് വിലയിരുത്തുന്നത്. താനെയില്‍ മാത്രമാണ് ശിവസേനയ്ക്ക് വ്യക്തമായ വിജയം ഉറപ്പിക്കാനായത്. പൂനെയില്‍ 74 സീറ്റുകള്‍ നേടി കേവല ഭൂരിപക്ഷം ബിജെപി നേടിയപ്പോള്‍ നാഗ്പൂരില്‍ 70 സീറ്റുകള്‍ നേടിയാണ് ഭരണം ഉറപ്പിച്ചത്. ഉല്ലാസ്നഗര്‍, പിംപ്രി-ചിഞ്ച്വാട്, നാസിക്, സോളാപ്പൂര്‍, അകോള, അമരാവതി കോര്‍പ്പറേഷനുകളിലും വ്യക്തമായ ഭൂരിപക്ഷത്തോടെ ബിജെപി അധികാരത്തിലെത്തി.