എയര്‍ കൂളര്‍ ഗോഡൗണില്‍ തീപിടുത്തം : ഹൈദരാബാദില്‍ ആറ് പേര്‍ മരിച്ചു

അറ്റാപൂരിലെ എയര്‍ കൂളര്‍ ഗോഡൗണില്‍ ബുധനാഴ്ച പുലര്‍ച്ചെയുണ്ടായ തീപിടുത്തത്തില്‍ ആറ് തൊഴിലാളികള്‍ മരിച്ചു. പുലര്‍ച്ചെ അഞ്ചു മണിയോടെയാണ് തീപിടുത്തമുണ്ടായത്. തീ വളരെ വേഗം പടര്‍ന്നുപിടിക്കുകയായിരുന്നുവെന്ന് പോലീസ് പറയുന്നു.

നാല് യൂണിറ്റ് ഫയര്‍ ഫോഴ്‌സ് എത്തിയാണ് തീ നിയന്ത്രണവിധേയമാക്കിയത്. ഗോഡൗണില്‍ നിന്നും കണ്ടെത്തിയ ആറ് മൃതദേഹങ്ങളും പോസ്റ്റ്‌മോര്‍ട്ടത്തിനായി ഉസ്മാനിയ ജനറല്‍ ഓശുപത്രിയിലേക്ക് മാറ്റി. മരിച്ചവരെല്ലാം ഛത്തീസ്ഗഢ്, ബിഹാര്‍ സ്വദേശികളാണ്.

സാധാരണയായി ഗോഡൗണില്‍ നാല് തൊഴിലാളികളാണ് ഉണ്ടാവുക. ചൊവ്വാഴ്ച രാത്രി രണ്ടു പേര്‍ കൂടി അധികമായി ജോലിക്ക് കയറിയിരുന്നു. ഗോഡൗണ്‍ ഉടമയെ കസ്റ്റഡിയിലെടുത്തതായി പോലീസ് കമ്മീഷണര്‍ പി.വി പദ്മജ പറഞ്ഞു. കെട്ടിടത്തിന് ആവശ്യമായ സുരക്ഷ സംവിധാനങ്ങള്‍ ഉണ്ടായിരുന്നില്ലെന്ന് പോലീസ് കണ്ടെത്തിയിട്ടുണ്ട്.