വിജയ് മല്യയെ ബ്രിട്ടന്‍ ഇന്‍ഡ്യയ്ക്കു കൈമാറിയേക്കും

ഇന്‍ഡ്യയിലെ വിവിധ ബാങ്കുകളില്‍ നിന്ന് 9000 കോടി രൂപ വായ്പയെടുത്തു മുങ്ങിയ വിജയ് മല്യയെ ബ്രിട്ടന്‍ ഇന്‍ഡ്യയ്ക്ക് കൈമാറിയേക്കും.ഇതു സംബന്ധിച്ചുള്ള രേഖകള്‍ കൈമാറാന്‍ ബ്രിട്ടന്‍ ഇന്‍ഡ്യയോട് ആവശ്യപ്പെട്ടിട്ടുണ്ട്.ഇരു രാജ്യങ്ങളുടെയും ഉന്നത ഉദ്യോഗസ്ഥര്‍ ഡല്‍ഹിയില്‍ നടത്തിയ കൂടിക്കാഴ്ചയിലാണ് ഇതു സംബന്ധിച്ച് തീരുമാനമായത്.

2016 ഡിസംബര്‍ രണ്ടിനാണ് ബാങ്കുകളെ കബളിപ്പിച്ച് വ്യവസായ ഭീമനായ മല്യ രാജ്യം വിട്ടത്.മല്യയെ മടക്കി കൊണ്ടു വരാനുള്ള മുംബൈ കോടതിയുടെ ഉത്തരവ് ആഭ്യന്തര മന്ത്രാലയം വിദേശകാര്യ മന്ത്രാലയത്തിന് കൈമാറിയിരുന്നു.മുംബൈ പ്രത്യേക കോടതി മല്യയ്‌ക്കെതിരെ ജാമ്യമില്ലാത്ത അറസ്റ്റ് വാറന്റ് പുറപ്പെടുവിച്ചിരുന്നു.ഇന്‍ഡ്യ-യുകെ മ്യൂച്ചല്‍ ലീഗല്‍ അസിസ്റ്റന്റ് ട്രീറ്റിയുടെ ഭാഗമായ മല്യയെ ഇന്‍ഡ്യയിലെത്തിക്കണമെന്നാവശ്യപ്പെട്ട് എന്‍ഫോഴ്‌സ്‌മെന്റ് ഡയറക്‌ട്രേറ്റ് കോടതിയില്‍ അപേക്ഷ സമര്‍പ്പിച്ചിരുന്നു.ഇത് അംഗീകരിച്ച രേഖയാണ് ആഭ്യന്തര മന്ത്രാലയം വിദേശകാര്യ മന്ത്രാലയത്തിന് കൈമാറിയത്.

ബ്രിട്ടനില്‍ നിന്നുള്ള അഞ്ചംഗ പ്രതിനിധി സംഘം രണ്ടു ദിവസമായി ഡല്‍ഹിയിലെ ഉന്നത ഉദ്യോഗസ്ഥരുമായി ഇതു സംബന്ധിച്ചുള്ള തീരുമാനത്തിനായി ചര്‍ച്ച നടത്തിയിരുന്നു.ആഭ്യന്തര-വിദേശ കാര്യ മന്ത്രാലയ ഉദ്യോഗസ്ഥരും,സി ബി ഐ ,എന്‍ഫോഴ്‌സ്‌മെന്റ് ഡയറക്‌ട്രേറ്റ് തുടങ്ങിയ ഏജന്‍സികളുടെ പ്രതിനിധികളും കൂടിക്കാഴ്ചയില്‍ പങ്കെടുത്തു. പ്രധാനമന്ത്രി നരേന്ദ്ര മോദിയും ബ്രിട്ടീഷ് പ്രധാനമന്ത്രി തെരേസാ മേയും കഴിഞ്ഞ നവംബര്‍ മാസത്തില്‍ നടത്തിയ കൂടിക്കാഴ്ചയെ തുടര്‍ന്നായിരുന്നു ഉദ്യോഗസ്ഥ തലത്തില്‍ നടത്തിയ ചര്‍ച്ച.

ലളിത് മോദി,ടൈഗര്‍ മേമന്‍ തുടങ്ങിയവരെയും കൈമാറുന്നതു സംബന്ധിച്ചുള്ള തീരുമാനമുണ്ടായേക്കുമെന്നാണ് റിപ്പോര്‍ട്ടുകള്‍.