കൊച്ചി മെട്രോ: 400 കോടി മിച്ചമുണ്ടാക്കാനായെന്ന്‌ ഇ. ശ്രീധരന്‍

കൊച്ചി മെട്രോ നിര്‍മാണത്തിനു പ്രതീക്ഷിച്ചിരുന്ന ചെലവില്‍ നിന്ന്‌ ഇതുവരെ 400 കോടി രൂപ മിച്ചമുണ്ടാക്കാനായെന്ന്‌ ഡി.എം.ആര്‍.സി. മുഖ്യ ഉപദേഷ്‌ടാവ്‌ ഇ. ശ്രീധരന്‍ വെളിപ്പെടുത്തി. നിര്‍മാണം സമയബന്ധിതമായി പൂര്‍ത്തിയാക്കാന്‍ കഴിഞ്ഞാല്‍ വലിയ ലാഭം കണ്ടെത്താന്‍ കഴിയും. ആലുവ മുതല്‍ പാലാരിവട്ടം വരെയുള്ള ഭാഗം മാര്‍ച്ച്‌ അവസാനത്തോടെ കമ്മിഷന്‍ ചെയ്യാനാകും. മാര്‍ച്ചില്‍ത്തന്നെ മെട്രോ സര്‍വീസ്‌ ആരംഭിക്കാനാകുമെന്നും അദ്ദേഹം മാധ്യമങ്ങളോടു പറഞ്ഞു. ഒന്നാം ഘട്ടമായി ആലുവ മുതല്‍ പേട്ട വരെയും രണ്ടാം ഘട്ടം പാലാരിവട്ടം മുതല്‍ കാക്കനാട്‌ വരെയുമാണ്‌ തീരുമാനിച്ചിട്ടുള്ളത്‌. മൂന്നാം ഘട്ടം കൂടി അടിയന്തരമായി തുടങ്ങണം. മഹാരാജാസ്‌ വരെ ആദ്യഘട്ട സര്‍വീസ്‌ ആരംഭിക്കണമെന്ന്‌ മെട്രോയെക്കുറിച്ച്‌ കഴിഞ്ഞ മാസം നടന്ന അവലോകനയോഗത്തില്‍ മുഖ്യമന്ത്രി നിര്‍ദേശിച്ചിരുന്നു. എന്നാല്‍ പാലാരിവട്ടം വരെ മാത്രമേ ഇപ്പോള്‍ സര്‍വീസ്‌ ആരംഭിക്കാന്‍ കഴിയുകയുള്ളൂവെന്നും ജൂണില്‍ മഹാരാജാസ്‌ വരെ മെട്രോ ഓടിത്തുടങ്ങുമെന്നും ഇ. ശ്രീധരന്‍ വ്യക്‌തമാക്കി.