മസ്തിഷ്‌ക മരണങ്ങളെപ്പറ്റി അന്വേഷിക്കണമെന്ന് മെഡിക്കൽ വിദ്യാഭ്യാസ ഡയറക്ടർക്ക് ഡോക്ടറുടെ പരാതി

അടുത്തിടെ മസ്തിഷ്ക മരണം സംഭവിച്ച ചെറുപ്പക്കാരന്റെ അവയവങ്ങൾ കൈമാറ്റം ചെയ്യപ്പെട്ടതിനെക്കുറിച്ച് അന്വേഷിക്കണമെന്നാവശ്യപ്പെട്ട് ഒരു ഡോക്ടർ മെഡിക്കൽ വിദ്യാഭ്യാസ ഡയറക്ടർക്ക് പരാതി നൽകി. നിഥിൻ എന്ന ചെറുപ്പക്കാരന്റെ അവയവങ്ങൾ കൈമാറ്റം ചെയ്യപ്പെട്ടതും മരണവും അന്വേഷിക്കണമെന്ന് ആവശ്യപ്പെട്ടാണ് കൊല്ലം സ്വദേശിയായ അലോപ്പതി ഡോക്ടർ എസ്. ഗണപതി പരാതി നൽകിയത്. മസ്തിഷ്കമരണം സ്ഥിരീകരിക്കാനും അവയവദാനത്തിനും വ്യക്തമായ വ്യവസ്ഥകൾ നിശ്ചയിക്കണമെന്നാവശ്യപ്പെട്ട് ഹൈക്കോടതിയിൽ നേരത്തേ പൊതു താത്പര്യ ഹർജി നൽകിയ ഡോക്ടറാണ് എസ്. ഗണപതി. കരുനാഗപ്പള്ളി മാരാരിത്തോട്ടം ആൽത്തറമൂട് പുതുമംഗലത്ത് കിഴക്കതിൽ മോഹനൻ – ലളിത ദമ്പതികളുടെ മകൻ നിഥിൻ (19) മസ്തിഷ്ക മരണത്തിന്റെ പേരിൽ നടക്കുന്ന അവയവ കച്ചവടത്തിന്റെ ഇരയാണെന്നാണ് ഡോ. ഗണപതി പരാതിയിൽ ആരോപിച്ചിരിക്കുന്നത്.ജനുവരി 4ന് രാത്രി 9 മണിയോടെയാണ് നിഥിൻ സ‌ഞ്ചരിച്ച ബൈക്ക് വീടിന് സമീപം മറ്റൊരു ബൈക്കുമായി കൂട്ടിയിടിച്ചത്. ഗുരുതരമായി പരിക്കേറ്റ നിഥിനെ കരുനാഗപ്പള്ളി താലൂക്കാശുപത്രിയിലും ആലപ്പുഴ വണ്ടാനം മെഡിക്കൽ കോളേജ് ആശുപത്രിയിലും എത്തിച്ചു. എന്നാൽ ഉടൻ തന്നെ മറ്റൊരു സ്വകാര്യ ആശുപത്രിയിലേക്ക് കൊണ്ടുപോകാനാണ് നിർദ്ദേശിച്ചത്. അവിടെ തീവ്ര പരിചരണ വിഭാഗത്തിലാക്കിയ നിഥിന്റെ അവസ്ഥയെക്കുറിച്ച് ബന്ധുക്കളോട് ആദ്യം ഒന്നും പറഞ്ഞില്ല.എന്നാൽ 5ന് ഉച്ചയ്ക്ക് ശേഷം ഒരാൾ വന്ന് അടുത്ത ബന്ധുക്കളെ മറ്റൊരു മുറിയിലേക്ക് കൊണ്ടുപോയി. നിഥിൻ ഇനി ജീവിക്കില്ലെന്നും അയാളുടെ അവയവങ്ങൾ ദാനം ചെയ്താൽ 9 പേരിലൂടെ ജീവിക്കുമെന്നും പറഞ്ഞു. പുറത്തെടുത്താൽ 15 മിനിട്ട് പോലും ജീവിക്കില്ലെന്നും അവയവങ്ങൾ ദാനം ചെയ്യണമെന്നും പറഞ്ഞ് അയാൾ സമ്മർദ്ദത്തിലാഴ്ത്തി. ഒടുവിൽ ബന്ധുക്കളുമായി ആലോചിച്ച് സമ്മർദ്ദത്തിന് വഴങ്ങി. നിഥിന്റെ അച്ഛൻ മോഹനൻ സമ്മതപത്രം ഒപ്പിട്ട് നൽകി. വൈകിട്ട് 4.45ന് മരിച്ചതായി സ്ഥിരീകരിച്ചു. അടുത്തദിവസം അവയവങ്ങൾ നീക്കി. ആശുപത്രി ചെലവായി 88,000 രൂപയുടെ ബില്ലും നൽകി. കോടികളുടെ കച്ചവടം നടക്കുന്ന വഴി ഇങ്ങനെ മാറ്റിവയ്ക്കുന്ന അവയവങ്ങൾക്ക് നിശ്ചയിച്ചിരിക്കുന്ന വിലയാണ് താഴെ കൊടുത്തിരിക്കുന്നത്‌ . ഹൃദയം, ശ്വാസകോശം (50 ലക്ഷം), കിഡ്നി- 2 പേർക്ക് (30 ലക്ഷം), കരൾ (60 ലക്ഷം), പാൻക്രിയാസ് (20 ലക്ഷം), ചെറുകുടൽ (20 ലക്ഷം) കോർണിയ (2 പേർക്ക്- ഒരു ലക്ഷം). സ്വകാര്യ ആശുപത്രികളിലെ ഇത്തരം കച്ചവടങ്ങള്‍ക്കെതിരെ നിയമം ശക്തമാക്കിയില്ലെങ്കില്‍ നമ്മുടെ ഭാവി തലമുറ ആയുസ്സ് എത്താതെ തന്നെ ഇത്തരം മാഫിയ തലവന്‍മാര്‍ നിയന്ത്രിക്കുന്ന ആശുപത്രികളില്‍ എരിഞ്ഞ് തീരും.