അമേരിക്കന്‍ പ്രസിഡന്റ് ഡൊണാള്‍ഡ് ട്രംപിനെ ഇന്ത്യയിലേക്ക് ക്ഷണിച്ച്‌ മോദി ; ഇരുവരുടേയും ഫോണ്‍സംഭാഷണം വളരെ ഊഷ്മളമെന്നും പ്രധാനമന്ത്രി

അമേരിക്കയുടെ പുതിയ പ്രസിഡന്റ് ഡൊണാള്‍ഡ് ട്രംപുമായുള്ള ഫോണ്‍ സംഭാഷണം വളരെയധികം ഹൃദയസ്പര്‍ശമായിരുന്നുവെന്നും അദ്ദേഹത്തെ ഇന്ത്യയിലേക്ക് ക്ഷണിക്കുന്നതായും പ്രധാനമന്ത്രി നരേന്ദ്രമോദി . ഇന്ത്യ ഒരു യഥാര്‍ത്ഥ സുഹൃത്താണെന്നും മോദിയെ അമേരിക്കയിലേക്ക് ക്ഷണിക്കുന്നതായും ട്രംപ് വ്യക്തമാക്കിയതിന് തൊട്ടു പിന്നാലെയാണ് മോദി ട്വീറ്റിലൂടെ അമേരിക്കന്‍ പ്രസിഡന്റിനെ ഇന്ത്യയിലേക്കും ക്ഷണിച്ചിരിക്കുന്നത്. ട്രംപിന് ഇന്ത്യയിലേക്കു സ്വാഗതമെന്ന് ഇന്ന് രാവിലെയാണ് പ്രധാനമന്ത്രി ട്വീറ്റ് ചെയ്തത്. ഇന്നലെ രാത്രിയാണ് ഡോണൾഡ് ട്രംപ്, നരേന്ദ്ര മോദിയെ ഫോണിൽ വിളിച്ചത്. അമേരിക്കയുടെ യഥാർഥ സുഹൃത്താണ് ഇന്ത്യയെന്നും ഏതൊരു പ്രതികൂല സാഹചര്യങ്ങളേയും നേരിടാൻ ഇന്ത്യ എന്നും ഒപ്പമുണ്ടായിരുന്നതായും ഇനിയും മുന്നോട്ട് അതു തുടരുമെന്നു പ്രതീക്ഷിക്കുന്നുവെന്നും ട്രം‌പ് പറഞ്ഞതായി വൈറ്റ് ഹൗസ് പുറത്തിറക്കിയ വാർത്താക്കുറിപ്പിൽ പറയുന്നു.