ജോലിയില്ല, ഡിപ്രഷന്‍; അമ്മയെക്കൊന്ന് മകന്‍ സ്വയം കഴുത്തറുത്തു മരിച്ചു: 77 പേജ് ആത്മഹത്യാക്കുറിപ്പ്

ന്യൂഡല്‍ഹി അമ്മയെ കൊലപ്പെടുത്തി ദിവസങ്ങള്‍ക്കു ശേഷം 25 വയസ്സുകാരന്‍ മകന്‍ ജീവനൊടുക്കിയതായി ഡല്‍ഹി പൊലീസ്. ക്ഷിജിത്താണു മാതാവ് മിഥിലേഷിനെ കൊന്ന ശേഷം ആത്മഹത്യ ചെയ്തത്. മിഥിലേഷിന്റെ മൃതദേഹം വീട്ടിലെ ശുചിമുറിയില്‍ കണ്ടെത്തി. കത്തി ഉപയോഗിച്ചാണു യുവാവ് ജീവനൊടുക്കിയത്. ഇവരുടെ വീട്ടില്‍നിന്ന് ദുര്‍ഗന്ധം പുറത്തുവരാന്‍ തുടങ്ങിയതോടെ അയല്‍വാസികളാണു പൊലീസില്‍ വിവരമറിയിച്ചത്. പൊലീസെത്തിയപ്പോള്‍ വീടിന്റെ വാതില്‍ അകത്തുനിന്നും പൂട്ടിയ നിലയിലായിരുന്നു. ബാല്‍ക്കണി വഴി അകത്തുകയറിയ പൊലീസ് ഉദ്യോഗസ്ഥര്‍ രണ്ടു പേരുടെയും മൃതദേഹങ്ങള്‍ കണ്ടെടുത്തു. രക്തത്തില്‍ കുളിച്ച നിലയിലാണു യുവാവിന്റെ മൃതദേഹം കണ്ടെത്തിയത്. മിഥിലേഷിന്റെ മൃതദേഹം അഴുകിത്തുടങ്ങിയ നിലയിലായിരുന്നു. ക്ഷിജിത്തിന്റെ 77 പേജുള്ള ആത്മഹത്യാക്കുറിപ്പ് കണ്ടെത്തിയതായി ഡിസിപി പ്രണവ് തയാല്‍ ദേശീയ മാധ്യമത്തോടു പറഞ്ഞു. വ്യാഴാഴ്ചയാണ് ക്ഷിജിത്ത് അമ്മയെ കൊന്നതെന്ന് പൊലീസ് അറിയിച്ചു. കത്തി ഉപയോഗിച്ച് സ്വന്തം കഴുത്തുമുറിച്ചാണു ക്ഷിജിത്ത് മരിച്ചത്. വിഷാദാവസ്ഥയിലായിരുന്നെന്നും ജോലിയില്ലാത്തതുകൊണ്ടു കൂടിയാണ് ജീവിതം അവസാനിപ്പിക്കുന്നതെന്നും ആത്മഹത്യാക്കുറിപ്പിലുണ്ട്. മരണത്തില്‍ മറ്റു ദുരൂഹതകളൊന്നും കണ്ടെത്താനായിട്ടില്ല. ഇവരുടെ ബന്ധുക്കളില്‍നിന്ന് കുടുംബത്തെക്കുറിച്ച് കൂടുതല്‍ വിവരങ്ങള്‍ ശേഖരിക്കാനാണു പൊലീസ് നീക്കം.