കടബാധ്യതയില്‍ വീട് വില്‍ക്കാന്‍ തീരുമാനിച്ചു; ടോക്കണ്‍ വാങ്ങുന്നതിന് രണ്ട് മണിക്കൂര്‍ മുന്‍പ് ഒരു കോടി രൂപ ലോട്ടറി

സംസ്ഥാന സര്‍ക്കാരിന്റെ ഫിഫ്റ്റി - ഫിഫ്റ്റി ഭാഗ്യക്കുറി മാറ്റിമറിച്ചത് കാസര്‍ഗോഡ് പാവൂര്‍ സ്വദേശി മുഹമ്മദ് ബാവയുടെ ജീവിതം തന്നെയാണ്. കടബാധ്യത മൂലം വീട് വില്‍പ്പനയ്ക്കായി ടോക്കണ്‍ വാങ്ങാന്‍ നിശ്ചയിച്ചിരുന്ന സമയത്തിന് രണ്ട് മണിക്കൂര്‍ മുന്‍പാണ് ഭാഗ്യദേവത മുഹമ്മദ് ബാവയെ തേടിയെത്തിയത്. വീട് നിര്‍മാണത്തിനും, മക്കളുടെ കല്യാണത്തിനുമായി ഉണ്ടാക്കിയ ഭാരിച്ച കട ബാധ്യതയെ തുടര്‍ന്ന് നേരത്തെ തന്നെ വീട് വില്‍ക്കാന്‍ മുഹമ്മദ് ബാവ തീരുമാനിച്ചിരുന്നു. 45 ലക്ഷം രൂപയായിരുന്നു കടബാധ്യത. 10 ലക്ഷം രൂപ ബാങ്കില്‍ നിന്ന് വായ്പയെടുത്തും 20 ലക്ഷം രൂപ ബന്ധുക്കളില്‍ നിന്ന് കടം വാങ്ങിയുമാണ് വീട് വച്ചത്. ഏറെ വൈകാതെ രണ്ടാമത്തെ മകളുടെ വിവാഹം കൂടി നടത്തിയതോടെ ദമ്പതികള്‍ മൂക്കറ്റം കടത്തിലായി. അതിനാല്‍ വെറും 8 മാസം മുന്‍പ് പണിത 2000 സ്‌ക്വയര്‍ ഫീറ്റിന്റെ വീട് 45 ലക്ഷം രൂപയ്ക്ക് വില്‍ക്കാനായിരുന്നു ബാവയുടെ തീരുമാനം. എന്നാല്‍, ബ്രോക്കറും വീട് വാങ്ങാനെത്തിയവരും വില താഴ്ത്തി 40 ലക്ഷം രൂപയാക്കി. വീട് വിറ്റ് സ്‌കൂളില്‍ പഠിക്കുന്ന പെണ്മക്കളുമായി വാടകവീട്ടിലേക്ക് മാറാനായിരുന്നു മുഹമ്മദ് ബാവ-ആമിന ദമ്പതികളുടെ പദ്ധതി. ഞായറാഴ്ച ഒരു മണിക്ക് വീട് വാങ്ങാനെത്തുന്നയാളുകളെ കാത്തിരിക്കുന്നതിനിടെ പുറത്തേക്ക് പോയ ബാവ 50-50 ലോട്ടറിയുടെ നാല് ടിക്കറ്റുകള്‍ വാങ്ങി. മൂന്ന് മണിയോടെ നറുക്കെടുപ്പ്. നറുക്കെടുപ്പില്‍ സിനിമാക്കഥ പോലെ നാടകീയാന്ത്യം. നറുക്കെടുപ്പിന് മണിക്കൂറുകള്‍ മാത്രം ബാക്കിനില്‍ക്കെ ബാവ എടുത്ത ലോട്ടറിയാണ് ജീവിതം തന്നെ മാറ്റി മറിച്ചത്. കടബാധ്യത തീര്‍ത്തുകഴിഞ്ഞ് അവശേഷിക്കുന്ന തുക കഷ്ടത അനുഭവിക്കുന്നവര്‍ക്ക് കൂടി മാറ്റിവയ്ക്കാനാണ് മുഹമ്മദ് ബാവയുടെ തീരുമാനം. ലക്ഷങ്ങളുടെ കണക്കുകള്‍ നല്‍കുന്ന ആലസ്യമില്ലാതെ വരുമാന മാര്‍ഗമായി ഉണ്ടായിരുന്ന പെയിന്റിംഗ് ജോലി തുടരണമെന്നും മുഹമ്മദ് ബാവ പറയുന്നു. അഞ്ച് മക്കളാണ് ദമ്പതികള്‍ക്കുള്ളത്. നാല് പെണ്മക്കളും ഒരു മകനും. മൂന്ന് ആഴ്ചകള്‍ക്കുമുന്‍പ് മകന്‍ ഖത്തറില്‍ ജോലിക്ക് കയറി. മുതിര്‍ന്ന രണ്ട് പെണ്മക്കള്‍ വിവാഹിതരാണ്.