കാട്ടുപന്നികളില്‍ ആന്ത്രാക്‌സ്: കോഴിക്കോട് ജാഗ്രതാ നിര്‍ദേശം

കോഴിക്കോട്: തൃശൂരില്‍ അതിരപ്പിള്ളി വനമേഖലയിലെ കാട്ടുപന്നികളില്‍ ആന്ത്രാക്‌സ് സ്ഥിരീകരിച്ച സാഹചര്യത്തില്‍ ജില്ലയിലും ജാഗ്രതാ നിര്‍ദേശം. മൃഗസംരക്ഷണ വകുപ്പാണ് ജാഗ്രതാ നിര്‍ദേശം പുറത്തിറക്കിയത്. ജില്ലയില്‍ നഗരത്തിലടക്കം കാട്ടുപന്നി ആക്രമണമുണ്ടായിട്ടുണ്ട്. മലയോര മേഖലയിലെ കര്‍ഷകര്‍ കാട്ടുപന്നിയടക്കമുള്ളവയുടെ ശല്യം കാരണം കൃഷിയുപേക്ഷിച്ച് കുടിയിറങ്ങേണ്ട അവസ്ഥയിലുമാണ്. കാട്ടുപന്നിയെ വെടിവയ്ക്കാനുള്ള അനുമതി തദ്ദേശസ്ഥാപനങ്ങള്‍ക്കു നല്‍കിയതോടെ ശല്യം തടയാമെന്ന പ്രതീക്ഷയിലാണ് കര്‍ഷകര്‍. ഇതിനിടെ ആന്ത്രാക്‌സ് മുന്നറിയിപ്പും പുറപ്പെടുവിച്ചതോടെ കര്‍ഷകര്‍ ആശങ്കയിലാണ്. വനപ്രദേശങ്ങളോടു ചേര്‍ന്നുള്ള ജനവാസ മേഖലകളില്‍ കാട്ടുപന്നികളോ മറ്റു മൃഗങ്ങളോ ചത്തുകിടക്കുന്നതു കണ്ടാല്‍ ജാഗ്രത പാലിക്കണമെന്നാണ് മൃഗസംരക്ഷണ വകുപ്പിന്റെ ഉത്തരവില്‍ പറയുന്നത്. ചത്ത ജീവികളെ കൈകൊണ്ട് തൊടുകയോ നേരിട്ട് കൈകാര്യം ചെയ്യുകയോ അരുത്. ജീവികള്‍ ചത്തുകിടക്കുന്നതായി ശ്രദ്ധയില്‍പ്പെട്ടാല്‍ തൊട്ടടുത്തുള്ള ജന്തുരോഗ നിയന്ത്രണ ഓഫിസിലോ (എഡിസിപി) വനംവകുപ്പിലോ അറിയിക്കാനാണ് ജില്ലാ മൃഗസംരക്ഷണ ഓഫിസര്‍ നിര്‍ദേശം നല്‍കിയിരിക്കുന്നത്. ഇത്തരം വിവരങ്ങള്‍ ജില്ലാ ജന്തുരോഗ നിയന്ത്രണ ഓഫിസിലേക്കും വിളിച്ചറിയിക്കാം. ഫോണ്‍: 0495 22762050