മഹാരാഷ്ട്രയില്‍ വിശ്വാസവോട്ട് നാളെ; ഉദ്ധവും സംഘവും സുപ്രീംകോടതിയിലേക്ക്?

മഹാരാഷ്ട്രയില്‍ ശിവസേന അധ്യക്ഷന്‍ ഉദ്ധവ് താക്കരെ നയിക്കുന്ന മഹാവികാസ് അഘാഡി സര്‍ക്കാരിന്റെ ഭാവി നിശ്ചയിക്കുന്ന വിശ്വാസ വോട്ട് നാളെ. സഭ ചേര്‍ന്ന് നാളെത്തന്നെ വിശ്വാസവോട്ടു തേടാന്‍ ഗവര്‍ണര്‍ ഭഗത് സിങ് കോഷിയാരി ആവശ്യപ്പെട്ടു. രാവിലെ 11 മണിക്ക് സഭ ചേരണം. വിശ്വാസ വോട്ടെടുപ്പു മാത്രമായിരിക്കണം അജന്‍ഡ. സഭാ നടപടികളുടെ വിഡിയോ ചിത്രീകരണം ഗവര്‍ണര്‍ക്കു സമര്‍പ്പിക്കണം. ഇതുമായി ബന്ധപ്പെട്ടു ഗവര്‍ണര്‍ നിയമസഭാ സെക്രട്ടറിക്ക് കത്തയച്ചു. വൈകിട്ട് അഞ്ച് മണിയോടെ നടപടികള്‍ പൂര്‍ത്തിയാക്കാനും ഗവര്‍ണര്‍ നിര്‍ദ്ദേശിച്ചിട്ടുണ്ട്. 'ശിവസേനയുടെ 39 എംഎല്‍എമാര്‍ മഹാവികാസ് അഘാഡി സഖ്യ സര്‍ക്കാരില്‍നിന്നു പിന്‍മാറാന്‍ ആത്മാര്‍ഥമായി ആഗ്രഹിക്കുന്നുവെന്ന് ചൂണ്ടിക്കാട്ടി പ്രിന്റ്, ഇലക്ട്രോണിക് മാധ്യമങ്ങളില്‍ വ്യാപക പ്രചാരണം നടക്കുന്നുണ്ട്. ഈ റിപ്പോര്‍ട്ടുകളും മറ്റനേകം തെളിവുകളും മുന്‍നിര്‍ത്തി, നിയമസഭയുടെ വിശ്വാസത്തോടെയാണ് സര്‍ക്കാര്‍ മുന്നോട്ടു പോകുന്നതെന്ന് വിശ്വാസവോട്ടെടുപ്പിലൂടെ തെളിയിക്കേണ്ടതാണെന്ന് ഞാന്‍ കരുതുന്നു' - ഗവര്‍ണറുടെ കത്തില്‍ പറയുന്നു. അതേസമയം, നാളെ വിശ്വാസവോട്ട് തേടാനുള്ള ഗവര്‍ണറുടെ ഉത്തരവിനെതിരെ മുഖ്യമന്ത്രി ഉദ്ധവ് താക്കറെ സുപ്രീംകോടതിയെ സമീപിക്കുമെന്നു സൂചനയുണ്ട്. വിശ്വാസവോട്ടെടുപ്പിനെതിരെ നിയമപോരാട്ടത്തിനാണ് ഉദ്ധവും സംഘവും തയാറെടുക്കുന്നത്. സഭാ സമ്മേളനം തടയണമെന്ന് ആവശ്യപ്പെട്ടാകും സര്‍ക്കാര്‍ സുപ്രീംകോടതിയിലെത്തുക. വിശ്വാസവോട്ട് നാളെയുണ്ടാകുമെന്നു വ്യക്തമായതിനു പിന്നാലെ, നിലവില്‍ അസമിലെ ഗുവാഹത്തിയില്‍ കഴിയുന്ന ശിവസേന വിമതര്‍ മുംബൈയിലേക്കു മടങ്ങും. വിമത നേതാവ് ഏക്‌നാഥ് ഷിന്‍ഡെയുടെ നേതൃത്വത്തില്‍ ഗുവാഹത്തിയിലെ ആഡംബര ഹോട്ടലില്‍ തങ്ങുന്ന എംഎല്‍എമാര്‍ നാളെ രാവിലെ മുംബൈയിലേക്കു മടങ്ങുമെന്നാണു വിവരം. വിശ്വാസവോട്ടിനുശേഷം ഭാവി പരിപാടികള്‍ തീരുമാനിക്കുമെന്ന് ഏക്‌നാഥ് ഷിന്‍ഡെ വ്യക്തമാക്കി. അതേസമയം, ജൂണ്‍ 30ന് വിശ്വാസവോട്ടു തേടാന്‍ ആവശ്യപ്പെട്ട് ഗവര്‍ണര്‍ അയച്ചതെന്ന പേരില്‍ സമൂഹമാധ്യമങ്ങളില്‍ പ്രചരിക്കുന്ന കത്ത് വ്യാജമാണെന്ന് രാജ്ഭവന്‍ വൃത്തങ്ങള്‍ വ്യക്തമാക്കി. ഇതിനു പിന്നാലെയാണ് വിശ്വാസവോട്ടു തേടാന്‍ നിര്‍ദ്ദേശിച്ച് ഗവര്‍ണര്‍ നിയമസഭാ സെക്രട്ടറിക്ക് കത്തയച്ചത്. മഹാരാഷ്ട്രയില്‍ അടുത്തിടെയായി നടക്കുന്ന രാഷ്ട്രീയ സംഭവവികാസങ്ങള്‍ അസ്വസ്ഥപ്പെടുത്തുന്നതാണെന്ന് ഗവര്‍ണര്‍ കത്തില്‍ ചൂണ്ടിക്കാട്ടി.