എംഎല്‍എമാരുടെ ഭാര്യമാര്‍ വഴി രശ്മിയുടെ ‘ഓപ്പറേഷന്‍’; ഉദ്ധവിന്റെ ഭാര്യയും കളത്തില്‍!

മഹാരാഷ്ട്രയില്‍ ഭരണകക്ഷിയായ ശിവസേനയിലെ വിമത എംഎല്‍എമാര്‍ മന്ത്രി ഏക്‌നാഥ് ഷിന്‍ഡെയുടെ നേതൃത്വത്തില്‍ തുടങ്ങിവച്ച രാഷ്ട്രീയ നീക്കം അനിശ്ചിതമായി തുടരുന്നതിനിടെ, മുഖ്യമന്ത്രി ഉദ്ധവ് താക്കറെയുടെ ഭാര്യ രശ്മി താക്കറെയും പ്രശ്‌ന പരിഹാരത്തിനായി രംഗത്ത്. ഗുവാഹത്തിയിലെ ഹോട്ടലില്‍ താമസിക്കുന്ന വിമത എംഎല്‍എമാരുടെ മനസ്സു മാറ്റാന്‍ അവരുടെ ഭാര്യമാരുമായി രശ്മി താക്കറെ ബന്ധപ്പെടുന്നതായി 'ഇന്ത്യ ടുഡേ' റിപ്പോര്‍ട്ട് ചെയ്തു. ഉദ്ധവ് താക്കറെയും ഗുവാഹത്തിയിലെ ക്യാംപിലുള്ള ചില വിമത എംഎല്‍എമാര്‍ക്ക് വ്യക്തിപരമായ നിലയില്‍ സ്ഥിരം സന്ദേശങ്ങള്‍ അയയ്ക്കുന്നതായി റിപ്പോര്‍ട്ടുണ്ട്. ഏതുവിധേനയും ഷിന്‍ഡെയ്ക്കൊപ്പമുള്ള വിമത എംഎല്‍എമാരുടെ മനസ്സു മാറ്റി ഭരണം നിലനിര്‍ത്തുകയാണ് ഉദ്ധവിന്റെയും ശിവസേനയുടെയും ലക്ഷ്യം. അതിനിടെ, അയോഗ്യരാക്കാതിരിക്കാന്‍ കാരണം ബോധിപ്പിക്കണമെന്ന് ആവശ്യപ്പെട്ട് ഏക്‌നാഥ് ഷിന്‍ഡെയടക്കം 16 ശിവസേനാ വിമത എംഎല്‍എമാര്‍ക്കു നിയമസഭാ സെക്രട്ടേറിയറ്റ് നോട്ടിസ് അയച്ചതോടെ മഹാരാഷ്ട്രയില്‍ കൂറുമാറ്റം നിയമപോരാട്ടത്തിലേക്കു നീങ്ങുകയാണ്. നാളെക്കകം മറുപടി നല്‍കണമെന്നാണു നിര്‍ദ്ദേശം. നിലവില്‍ സഭാധ്യക്ഷനായ ഡപ്യൂട്ടി സ്പീക്കറെ പുറത്താക്കണമെന്ന വിമതപക്ഷത്തിന്റെ ആവശ്യം പരിഗണിച്ചില്ല. ഇതിനു രണ്ടിനുമെതിരെ ഗവര്‍ണറെയും കോടതിയെയും സമീപിക്കാനാണു വിമതരുടെ നീക്കം. ശിവസേനാ സ്ഥാപകനും മുഖ്യമന്ത്രി ഉദ്ധവ് താക്കറെയുടെ പിതാവുമായ ബാല്‍ താക്കറെയുടെ പേര് ഷിന്‍ഡെ പക്ഷം ഉപയോഗിക്കുന്നതു തടയണമെന്ന് ആവശ്യപ്പെട്ട് തിരഞ്ഞെടുപ്പു കമ്മിഷനെ സമീപിക്കാനും ശിവസേന തീരുമാനിച്ചു. പാര്‍ട്ടി വിട്ടിട്ടില്ലെന്നും ശിവസേന (ബാലാസാഹെബ്) എന്ന പേരില്‍ പുതിയ വിഭാഗമായി പ്രവര്‍ത്തിക്കുമെന്നും വിമത എംഎല്‍എ ദീപക് കേസര്‍ക്കര്‍ അറിയിച്ചതിനെ തുടര്‍ന്നാണിത്. താക്കറെയുടെ പേര് ഉപയോഗിക്കാന്‍ വിമതര്‍ക്ക് അധികാരമില്ലെന്ന് ഉദ്ധവ് തിരിച്ചടിച്ചു. ബാല്‍ താക്കറെ വികാരവും വൈകാരിക ഇടപെടലുമായി അണികളെ ചേര്‍ത്തുനിര്‍ത്താനാണ് പാര്‍ട്ടി അധ്യക്ഷന്‍ ഉദ്ധവിന്റെ ശ്രമം. വിമത മന്ത്രിമാരെ 24 മണിക്കൂറിനകം പദവിയില്‍ നിന്നു മാറ്റുമെന്നു ശിവസേന നേതാവ് സഞ്ജയ് റാവുത്ത് മുന്നറിയിപ്പ് നല്‍കിയത് അവരെ സമ്മര്‍ദത്തിലാക്കിയിട്ടുണ്ട്. അതിനിടെ, അസമില്‍ നിന്നു പ്രത്യേക വിമാനത്തില്‍ ഗുജറാത്തിലെത്തിയ ഏക്‌നാഥ് ഷിന്‍ഡെ, മുതിര്‍ന്ന ബിജെപി നേതാവും മഹാരാഷ്ട്ര മുന്‍ മുഖ്യമന്ത്രിയുമായ ദേവേന്ദ്ര ഫഡ്‌നാവിസുമായി ചര്‍ച്ച നടത്തിയെന്നാണു റിപ്പോര്‍ട്ട്. കേന്ദ്ര ആഭ്യന്തരമന്ത്രി അമിത് ഷായെ കണ്ടെന്നും സ്ഥിരീകരിക്കാത്ത വിവരമുണ്ട്. നിയമനടപടികളെല്ലാം വിലയിരുത്തിയ ശേഷം മാത്രം പരസ്യ ഇടപെടല്‍ മതിയെന്നാണു ബിജെപി നിലപാട്. 55 ശിവസേന എംഎല്‍എമാരില്‍ 40 പേരുടെയും 10 സ്വതന്ത്രരുടെയും പിന്തുണയുണ്ടെന്ന് ആവര്‍ത്തിക്കുന്നുണ്ടെങ്കിലും ശക്തമായ തീരുമാനങ്ങളൊന്നും വിമതര്‍ ഇന്നലെയും പ്രഖ്യാപിച്ചില്ല. ഉദ്ധവിനു ശിവസേനാ ദേശീയ നിര്‍വാഹക സിമിതിയോഗം പൂര്‍ണപിന്തുണ പ്രഖ്യാപിച്ചു. എന്നാല്‍, മുന്‍കേന്ദ്രമന്ത്രി അനന്ത് ഗിഥെ, പ്രമുഖ നേതാവ് രാംദാസ് കദം എന്നിവര്‍ യോഗത്തില്‍ പങ്കെടുത്തില്ല.