ഒമാനില്‍ നിറഞ്ഞൊഴുകിയ വാദിയില്‍ കുടുങ്ങിയ കുട്ടികളെ സാഹസികമായി രക്ഷിച്ച് യുവാവ്

കനത്ത മഴയെതുടര്‍ന്ന് ഒമാനില്‍ നിറഞ്ഞൊഴുകിയ വാദിയില്‍ കുടുങ്ങിയ കുട്ടികളെ രക്ഷപ്പെടുത്തി യുവാവ്. വെള്ളിയാഴ്ച ഒമാനിലെ ബഹ്ല വിലായത്തിലാണ് സംഭവം. അലി ബിന്‍ നാസ്സറാണ് നിറഞ്ഞൊഴുകിയ വാദിയില്‍നിന്ന് കുട്ടികളെ സാഹസികമായി രക്ഷിച്ച് കരക്കെത്തിച്ചത്. കനത്ത മഴയില്‍ വെള്ളം കുത്തിയൊലിക്കുകയായിരുന്നു. ഇതിനിടെയാണ് രണ്ട് കുട്ടികള്‍ കുടുങ്ങി കിടക്കുന്നത് ഇദ്ദേഹത്തിന്റെ ശ്രദ്ധയില്‍പ്പെടുന്നത്. ഉടനെതന്നെ ധൈര്യം സംഭരിച്ച് കുത്തിയൊലിക്കുന്ന വാദിയില്‍ ഇറങ്ങി കുട്ടികളെ തോളിലേറ്റി കരക്കെത്തിക്കുകയായിരുന്നു. വാദിക്ക് സമീപത്ത്നിന്ന് കയറും മറ്റ് സൗകര്യങ്ങളും നല്‍കി മറ്റുള്ളവരും ഇദ്ദേഹത്തിന് സഹായവുമായി എത്തി. രക്ഷപ്പെടുത്തുന്നതിന്റെ വിഡിയോ സമൂഹമാധ്യമങ്ങളില്‍ നിമിഷങ്ങള്‍ക്കകം വൈറലാകുകയും ചെയ്തു. നിരവധിപേരാണ് ഇദ്ദേഹത്തിന് അഭിനന്ദനവുമായി എത്തിയത്.ദാഹിറ, ദാഖിലിയ, വടക്കന്‍ ശര്‍ഖിയ, തെക്കന്‍ ബത്തിന തുടങ്ങി രാജ്യത്ത് വിവിധ ഗവര്‍ണറേറ്റുകളില്‍ കഴിഞ്ഞ ദിവസം വേനല്‍ മഴ പെയ്തതിനാല്‍ വാദികള്‍ നിറഞ്ഞൊഴുകുകയാണ്. വാദികള്‍ക്ക് സമീപം ഇരിക്കുന്നത് ഒഴിവാക്കണമെന്നും കുട്ടികളെ നിരീക്ഷണമെന്നും ഇത്തരം സ്ഥലങ്ങളിലേക്ക് ഒറ്റക്ക് വിടരുതെന്നും സിവില്‍ ഡിഫന്‍സ് ആന്‍ഡ് ആംബുലന്‍സ് അതോറിറ്റി നേരത്തെ മുന്നറിയിപ്പ് നല്‍കിയിരുന്നു. എന്നാല്‍, ഇതൊന്നും പരിഗണിക്കാതെ നിരവധിപേരാണ് വാദി മുറിച്ച് കടക്കുന്നത്.