സ്വപ്നയുടെ വെളിപ്പെടുത്തല്‍ നാടകത്തിന് പിന്നില്‍ ബിജെപിയും യുഡിഎഫും; ആരോപണവുമായി കോടിയേരി

സ്വപ്ന സുരേഷ് നടത്തുന്ന വെളിപ്പെടുത്തല്‍ നാടകത്തിന് പിന്നില്‍ ബിജെപി - യുഡിഎഫ് ഗൂഢാലോചനയാണെന്ന് സിപിഐഎം സംസ്ഥാന സെക്രട്ടറി കോടിയേരി ബാലകൃഷ്ണന്‍. എല്‍.ഡി.എഫ് ബഹുജന സംഗമം ഉദ്ഘാടനം ചെയ്യുകയായിരുന്നു അദ്ദേഹം. കേന്ദ്ര ഏജന്‍സികളുടെ കൈയ്യിലെ കളിപ്പാവയാണ് സ്വപ്ന. ഇതൊന്നും ഈ കേരളത്തില്‍ വിലപ്പോവില്ല. വികസന പദ്ധതികള്‍ അട്ടിമറിക്കാനും നാട്ടില്‍ കലാപം വിതയ്ക്കാനും കോണ്‍ഗ്രസും ബി.ജെ.പിയും ശ്രമിക്കുകയാണെന്ന് അദ്ദേഹം ആരോപിച്ചു. ഈ തീക്കളി നിര്‍ത്തിയില്ലെങ്കില്‍ ജനം കാര്യങ്ങള്‍ പഠിപ്പിക്കും. സമരാഭാസത്തിന് മുന്നില്‍ കീഴടങ്ങാന്‍ സര്‍ക്കാരും എല്‍ഡിഎഫും തയ്യാറല്ലെന്നും മുഖ്യമന്ത്രിയെ ആക്രമിക്കാനുള്ള ശ്രമത്തെ ജനങ്ങള്‍ ചെറുക്കുമെന്നും കോടിയേരി വ്യക്തമാക്കി. കാനം രാജേന്ദ്രന്‍ എല്‍.ഡി.എഫ് ബഹുജന സംഗമത്തില്‍ അധ്യക്ഷത വഹിച്ചു. അതേസമയം, സ്വര്‍ണക്കടത്ത് കേസില്‍ സംസ്ഥാന സര്‍ക്കാരിനെതിരെ സിബിഐ അന്വേഷണം വേണമെന്ന് ആവശ്യപ്പെട്ട് സ്വപ്ന സുരേഷ് പ്രധാനമന്ത്രിക്ക് കത്തയച്ചു. സ്വര്‍ണക്കടത്ത് കേസില്‍ പ്രധാനപങ്കുവഹിച്ചത് എം ശിവശങ്കര്‍ ഐഎഎസ് ആണ്. രഹസ്യമൊഴിയുടെ പേരില്‍ തന്നെയെയും അഭിഭാഷകനെയും സര്‍ക്കാര്‍ ദ്രോഹിക്കുന്നുവെന്ന് സ്വപ്ന ആരോപിച്ചു. പ്രധാനമന്ത്രിയെ നേരിട്ട് കാണാന്‍ അനുമതി നല്‍കണമെന്നും ഇന്ത്യ കണ്ട ഏറ്റവും വലിയ തട്ടിപ്പാണ് സ്വര്‍ണക്കടത്തെന്നും സ്വപ്ന കത്തില്‍ സൂചിപ്പിക്കുന്നു. സ്വര്‍ണക്കടത്ത് കേസില്‍ സ്വപ്ന സുരേഷ് കസ്റ്റംസിന് നല്‍കിയ 164 മൊഴി പകര്‍പ്പ് എന്‍ഫോഴ്‌സ്‌മെന്റിന് നല്‍കാന്‍ കോടതി ഉത്തരവ് വന്നിരുന്നു. അന്വേഷണം പൂര്‍ത്തിയായ സാഹചര്യത്തില്‍ ഇ ഡിയുടെ അപേക്ഷ പരിഗണിക്കുന്നതിനെ കസ്റ്റംസ് എതിര്‍ത്തില്ല. തുടര്‍ന്നാണ് സ്വപ്ന സുരേഷ്, സരിത് എന്നിവര്‍ നല്‍കിയ മൊഴികളില്‍ ഒന്ന് ഇഡിയ്ക്ക് നല്‍കാന്‍ സാമ്പത്തിക കുറ്റാന്വേഷണ കോടതി ഉത്തരവിട്ടത്. ഡോളര്‍ കടത്ത് കേസില്‍ 164 മൊഴി ആവശ്യപ്പെട്ടുള്ള ഇ.ഡി ഹര്‍ജിയില്‍ കസ്റ്റംസ് വിശീദകരണം കേട്ട ശേഷം തീരുമാനമെടുക്കാമമെടുക്കാമെന്ന് കോടതി വ്യക്തമാക്കി.