കോഴിക്കോട് കോര്‍പറേഷനില്‍ 300 ലേറെ കെട്ടിടങ്ങള്‍ ചട്ടവിരുദ്ധമായി ക്രമപ്പെടുത്തി; പിന്നില്‍ വന്‍സംഘമെന്ന് സംശയം

കോഴിക്കോട്: കോര്‍പ്പറേഷന്‍ പരിധിയില്‍ കഴിഞ്ഞ ആറുമാസത്തിനിടെ 300ഓളം കെട്ടിടങ്ങള്‍ ചട്ടവിരുദ്ധമായി ക്രമപ്പെടുത്തി. നിര്‍മാണാനുമതി നല്‍കുന്ന സോഫ്റ്റ് വെയര്‍ പാസ് വേഡ് ചോര്‍ത്തിയാണ് ഇത്രയും കെട്ടിടങ്ങള്‍ക്ക് അനുമതി നല്‍കിയത്. മൂന്ന് ഘട്ടങ്ങളില്‍ പരിശോധന നടത്തി മാത്രമേ കെട്ടിട നമ്പര്‍ നല്‍കാന്‍ കഴിയൂവെന്നിരിക്കെ നടന്ന ക്രമക്കേടിന് പിന്നില്‍ വിലിയ സംഘം പ്രവര്‍ത്തിക്കുന്നതായാണ് സൂചന. നഗരസഭ പൊളിക്കാന്‍ നിര്‍ദ്ദേശം നല്‍കിയ കെട്ടിടത്തിന് നമ്പരിട്ട് നികുതി സ്വീകരിച്ച സംഭവത്തിന് തൊട്ടുപുറകേയാണ് കൂടുതല്‍ ക്രമക്കേടുകള്‍ പുറത്തുവരുന്നത്. ആറുമാസത്തിനിടെ ചെറുവണ്ണൂര്‍ സോണല്‍ ഓഫീസില്‍ 260, കോര്‍പ്പറേഷന്‍ ഓഫീസില്‍ 30, ബേപ്പൂര്‍ സോണല്‍ ഓഫീസില്‍ നാല് എന്നിങ്ങനെ അനധികൃത നിര്‍മ്മാണങ്ങള്‍ ക്രമവത്കരിച്ചിട്ടുണ്ട്. സഞ്ജയ് സോഫ്റ്റ് വെയറിന്റെ പാസ് വേഡ് ചോര്‍ത്തിയാണ് ക്രമക്കേട് നടന്നതെന്ന് കോര്‍പ്പറേഷന്‍ കണ്ടെത്തി. ഇതിന് വലിയ സംഘം പ്രവര്‍ത്തിക്കുന്നുണ്ടെന്നാണ് സൂചന. മൂന്ന് ഘട്ടങ്ങളിലുളള പരിശോധനയിലൂടെ മാത്രമേ സോഫ്റ്റ് വെയറിലൂടെ ഒരു കെട്ടിടത്തിന്റെ നികുതി സ്വീകരിക്കാനാവൂ. പ്രസ്തുത കെട്ടിടത്തിന് ക്രമക്കേടുകളൊന്നുമില്ലെന്ന് ഉദ്യോഗസ്ഥന്‍ നേരിട്ട് സാക്ഷ്യപ്പെടുത്തുകയും വേണം. ഇക്കാര്യങ്ങളിലെല്ലാം വ്യക്തമായ ക്രമക്കേട് നടന്നിട്ടുണ്ട്. അതായത് ഒരു ഉദ്യോഗസ്ഥന്റെ മാത്രം യൂസര്‍ നെയിമോ പാസ് വേഡോ ചോര്‍ത്തുക വഴി ക്രമക്കേട് കാണിക്കാനാവില്ല. കഴിഞ്ഞ ദിവസം കണ്ടെത്തിയ ക്രമക്കേടിന്റെ അടിസ്ഥാനത്തില്‍ ആഭ്യന്തര അന്വേഷണത്തിന് മാത്രമാണ് കോര്‍പ്പറേഷന്‍ ഉത്തരവിട്ടിരിക്കുന്നത്. ക്രമവത്കരിച്ച കെട്ടിടങ്ങള്‍ക്ക് ഡിജിറ്റല്‍ സിഗ്‌നേചര്‍ ഇട്ടത് ചെറുവണ്ണൂര്‍ സോണല്‍ ഓഫീസില്‍ നിന്നാണെന്ന് കണ്ടെത്തിയിട്ടുണ്ട്. നിലവില്‍ നാല് കെട്ടിടങ്ങളില്‍ മാത്രമാണ് ക്രമക്കേട് കണ്ടെത്തിയിരിക്കുന്നതെന്നും കെട്ടിട ഉടമകള്‍, ഉദ്യോഗസ്ഥര്‍ എന്നിവരില്‍ നിന്ന് ഉടന്‍ മൊഴിയെടുക്കുമെന്നുമാണ് കോര്‍പ്പറേഷന്‍ ഇപ്പോഴും വിശദീകരിക്കുന്നത്.