അഗ്‌നിപഥ് പ്രതിഷേധം: ബിഹാറില്‍ ട്രെയിന്‍ യാത്രക്കാരന്‍ മരിച്ചു, ആകെ രണ്ടു മരണം

പട്‌ന അഗ്‌നിപഥ് പ്രതിഷേധത്തിനിടെ ബിഹാറില്‍ ട്രെയിന്‍ യാത്രക്കാരന്‍ മരിച്ചു. ലഖിസരായില്‍ തകര്‍ത്ത ട്രെയിനിലുണ്ടായിരുന്ന യാത്രക്കാരനാണ് മരിച്ചത്. ഇതോടെ പ്രതിഷേധങ്ങളില്‍ മരിച്ചവരുടെ എണ്ണം രണ്ടായി. നേരത്തെ തെലങ്കാനയിലെ സെക്കന്ദരാബാദില്‍ ട്രെയിന്‍ കത്തിച്ചു പ്രതിഷേധിച്ചവരില്‍ ഒരാളും മരിച്ചിരുന്നു. വെള്ളിയാഴ്ച വൈകുന്നേരം 340ല്‍ അധികം ട്രെയിനുകളുടെ സര്‍വീസിനെയാണ് പ്രതിഷേധം ബാധിച്ചത്. 200ല്‍ അധികം ട്രെയിനുകള്‍ റദ്ദാക്കുകയും ചെയ്തു. ബിഹാറിലാണ് പ്രതിഷേധക്കാര്‍ ഏറ്റവുമധികം നാശനഷ്ടങ്ങള്‍ വരുത്തിവച്ചത്. 10 ട്രെയിനുകള്‍ കത്തിച്ച പ്രതിഷേധക്കാര്‍ പട്‌ന, അറാ, ലഖിസരായ്, സസാറാം, വൈശാലി, മുംഗര്‍, സമസ്തിപുര്‍, നളന്ദ, അര്‍വാള്‍, ജെഹാനാബാദ്, സുപൗള്‍, ബെട്ടിയ, മാധേപുര ജില്ലകളിലും പൊതുസ്വത്തിന് നാശനഷ്ടം വരുത്തി. അതിനിടെ, ബിഹാര്‍ ഉള്‍പ്പെടെയുള്ള സംസ്ഥാനങ്ങളില്‍ ജാഗ്രത തുടരുന്നു. വിവിധ വിദ്യാര്‍ഥി സംഘടനകള്‍ ഇന്ന് ബിഹാറില്‍ ബന്ദ് പ്രഖ്യാപിച്ചിട്ടുണ്ട്. ആര്‍ജെഡി ഉള്‍പ്പെടെയുള്ള പാര്‍ട്ടികള്‍ ബന്ദിന് പിന്തുണയും പ്രഖ്യാപിച്ചിട്ടുണ്ട്. പ്രതിഷേധം പടരാതിരിക്കാന്‍ വിവിധയിടങ്ങളില്‍ ഇന്റര്‍നെറ്റ് സേവനം റദ്ദാക്കുന്നതടക്കമുള്ള നടപടികള്‍ തുടരുന്നു.