കോവിഡ്: കരുതല്‍ഡോസ് നല്‍കാന്‍ പ്രത്യേകയജ്ഞം

തിരുവനന്തപുരം: വ്യാഴാഴ്ചമുതല്‍ ആറുദിവസം കോവിഡ് വാക്‌സിന്റെ കരുതല്‍ഡോസ് (മൂന്നാംഡോസ്) നല്‍കാന്‍ പ്രത്യേകയജ്ഞം നടത്തും. ഈ ആഴ്ചയിലെ വ്യാഴം, വെള്ളി ദിവസങ്ങളിലും അടുത്ത ആഴ്ചയിലെ തിങ്കള്‍, ചൊവ്വ, വ്യാഴം, വെള്ളി ദിവസങ്ങളിലുമാണ് വാക്‌സിന്‍ നല്‍കുക. 60 വയസിനുമുകളിലുള്ള പാലിയേറ്റീവ് കെയര്‍ രോഗികള്‍, കിടപ്പുരോഗികള്‍, വയോജനമന്ദിരങ്ങളിലുള്ളവര്‍ എന്നിവര്‍ക്ക് കരുതല്‍ഡോസ് വീട്ടിലെത്തി നല്‍കും. സംസ്ഥാനത്ത് കോവിഡ് രോഗികളുടെ എണ്ണം ഉയരുന്ന സാഹചര്യത്തിലാണ് തീരുമാനം. മന്ത്രി വീണാ ജോര്‍ജിന്റെ അധ്യക്ഷതയില്‍ ചേര്‍ന്ന ആരോഗ്യവകുപ്പ് ഉന്നതതലയോഗം സംസ്ഥാനത്തെ രോഗസാഹചര്യം വിലയിരുത്തി. എറണാകുളം, തിരുവനന്തപുരം, കോട്ടയം, കോഴിക്കോട്, തൃശ്ശൂര്‍ ജില്ലകളിലാണ് രോഗികള്‍ കൂടുതല്‍. ഒമിക്രോണിന്റെ വകഭേദമാണ് പടരുന്നത്. ഇതിന് രോഗതീവ്രത കുറവാണെങ്കിലും പെട്ടന്ന് പകരാന്‍ സാധ്യതയുണ്ട്. എല്ലാവരും കോവിഡ് മാര്‍ഗനിര്‍ദേശങ്ങള്‍ കൃത്യമായി പാലിക്കുകയും മാസ്‌ക് ധരിക്കുകയും വേണം. പ്രായമായവരും അനുബന്ധരോഗമുള്ളവരും പ്രത്യേകം ശ്രദ്ധിക്കണം. രോഗലക്ഷണങ്ങളുള്ളവര്‍ കോവിഡ് പരിശോധന നടത്തണം. രണ്ടു ഡോസ് വാക്‌സിന്‍ എടുത്തെന്നു കരുതി കരുതല്‍ഡോസ് എടുക്കാതിരിക്കരുതെന്നും ആരോഗ്യവകുപ്പ് നിര്‍ദേശിച്ചു.