ബെംഗളൂരു-കണ്ണൂര്‍ എക്സ്പ്രസ് കോഴിക്കോടുവരെ നീട്ടും; മംഗലാപുരം-കോഴിക്കോട് എക്സ്പ്രസ് പാലക്കാട് വരെ

കോഴിക്കോട്: മംഗലാപുരം-രാമേശ്വരം എക്സ്പ്രസ് ഉള്‍പ്പെടെ കോഴിക്കോടിന് മൂന്ന് തീവണ്ടികള്‍ കൂടി ലഭിച്ചതായി എം.കെ. രാഘവന്‍ എം.പി. അറിയിച്ചു. ഹാസന്‍ വഴിപോവുന്ന 16512/11 ബെംഗളൂരു-മംഗലാപുരം-കണ്ണൂര്‍ എക്സ്പ്രസ് കോഴിക്കോട് വരെയും 16610 മംഗലാപുരം-കോഴിക്കോട്-എക്സ്പ്രസ് പാലക്കാട് വരെയും നീട്ടും. മംഗലാപുരം-കോഴിക്കോട്-രാമേശ്വരം എക്സ്പ്രസാണ് പുതുതായി ലഭിച്ചത്. ബെംഗളൂരുവില്‍ ചൊവ്വാഴ്ച ചേര്‍ന്ന ഇന്ത്യന്‍ റെയില്‍വേ ടൈംടേബിള്‍ കമ്മിറ്റിയുടെതാണ് തീരുമാനം. കമ്മിറ്റിയുടെ നിര്‍ദേശങ്ങള്‍ക്ക് റെയില്‍വേ ബോര്‍ഡിന്റെ അംഗീകാരം ലഭിക്കുന്നതോടെ സര്‍വീസുകള്‍ ആരംഭിക്കും. നിലവില്‍ കണ്ണൂരില്‍ നിന്നുള്ള യശ്വന്തപുര എക്സ്പ്രസ് മാത്രമാണ് ബെംഗളൂരുവിലേക്ക് കോഴിക്കോട്ടുനിന്നുള്ള യാത്രക്കാര്‍ക്ക് ഏക ആശ്രയം. ബെംഗളൂരു- മംഗലാപുരം-കണ്ണൂര്‍ എക്സ്പ്രസ് കോഴിക്കോടുവരെ നീട്ടുന്നത് മലബാറിലെ യാത്രക്കാര്‍ക്ക് വലിയ ആശ്വാസമാവും. കാലങ്ങളായി ഈ ആവശ്യമുന്നയിക്കുന്നുണ്ടെങ്കിലും റെയില്‍വേ പരിഗണിച്ചിരുന്നില്ല. സതേണ്‍ റെയില്‍വേയെ സമീപിച്ചപ്പോള്‍ പ്ലാറ്റ്‌ഫോം അഭാവം ഉള്‍പ്പെടെയുള്ള കാരണങ്ങള്‍ ചൂണ്ടിക്കാട്ടി വിമുഖത കാട്ടുകയായിരുന്നുവെന്ന് എം.പി. പറഞ്ഞു. മേയ് 30-ന് സതേണ്‍ റെയില്‍വേ ജനറല്‍ മാനേജരുമായി നടത്തിയ കൂടിക്കാഴ്ചയാണ് നിര്‍ണായകമായത്. മംഗലാപുരം-കോഴിക്കോട്-രാമേശ്വരം എക്സ്പ്രസ് സര്‍വീസ് ആരംഭിക്കുന്നതോടെ രാമേശ്വരം, പളനി തീര്‍ഥാടകര്‍ക്കും കൊടൈക്കനാലിലേക്കുള്ള വിനോദ സഞ്ചാരികള്‍ക്കും പ്രയോജനം ചെയ്യും.