ഇഡിക്ക് മുന്നിലേക്ക് രാഹുല്‍; അക്ബര്‍ റോഡ് അടച്ചു, നിരോധനാജ്ഞ: പ്രവര്‍ത്തകര്‍ പിടിയില്‍

നാഷനല്‍ ഹെറാള്‍ഡ് കേസില്‍ രാഹുല്‍ ഗാന്ധി ഇഡിക്കു മുന്‍പില്‍ ഹാജരാകുന്നതിന്റെ മുന്നോടിയായി കോണ്‍ഗ്രസ് എന്‍ഫോഴ്സ്മെന്റ് ഡയറക്ടറേറ്റ് ഓഫിസിലേക്കു മാര്‍ച്ച് നടത്തുന്നതു കണക്കിലെടുത്ത് അക്ബര്‍ റോഡിലും പരിസരത്തും നിരോധനാജ്ഞ. എഐസിസി ആസ്ഥാനം പൊലീസ് വലയത്തിലാണ്. അക്ബര്‍ റോഡിലേക്കുള്ള എല്ലാ പ്രവേശനകവാടവും പൊലീസ് അടച്ചു. ഓഫിസിലേക്കെത്തുന്ന കോണ്‍ഗ്രസ് പ്രവര്‍ത്തകരെ പൊലീസ് കസ്റ്റഡിയിലെടുത്തു നീക്കുന്നു. നാഷനല്‍ ഹെറാള്‍ഡ് കേസില്‍ രാഹുല്‍ ഗാന്ധി ഇന്ന് ഇഡിക്കു മുന്നില്‍ ഹാജരാകും. പ്രവര്‍ത്തകര്‍ക്കൊപ്പം പ്രകടനമായി പോയി ഹാജരാകാനായിരുന്നു നീക്കം. കോണ്‍ഗ്രസ് പ്രവര്‍ത്തക സമിതി അംഗങ്ങള്‍, എംപിമാര്‍, സംസ്ഥാനങ്ങളിലെ മുഖ്യമന്ത്രിമാര്‍ എന്നിവര്‍ രാഹുലിനെ അനുഗമിക്കാനും തീരുമാനിച്ചിരുന്നു. എന്നാല്‍ നേതാക്കള്‍ക്കൊപ്പം പോകുന്നതു ഡല്‍ഹി പൊലീസ് വിലക്കി. ക്രമസമാധാന പ്രശ്‌നം ചൂണ്ടിക്കാട്ടിയാണു പൊലീസിന്റെ തീരുമാനം. എഐസിസി ആസ്ഥാനം സ്ഥിതി ചെയ്യുന്ന അക്ബര്‍ റോഡിനു മുന്നില്‍ പൊലീസ് സുരക്ഷ ശക്തമാക്കി. രാജ്യത്തെ എല്ലാ ഇഡി ഓഫിസുകള്‍ക്കു മുന്നിലും കോണ്‍ഗ്രസ് സത്യഗ്രഹ സമരം നടത്തുമെന്നും അറിയിച്ചിട്ടുണ്ട്. എന്തു വില കൊടുത്തും നേതാക്കള്‍ രാഹുല്‍ ഗാന്ധിക്കൊപ്പം പോകുമെന്നും ബിജെപി രാഷ്ട്രീയ നാടകം കളിക്കുകയാണെന്നും കെ.സി. വേണുഗോപാല്‍ പറഞ്ഞു.