വിരട്ടാന്‍ നോക്കിയെങ്കിലും നടന്നില്ല; എന്തും വിളിച്ചുപറയാമെന്നു കരുതരുത്: മുഖ്യമന്ത്രി

തന്നെ വിരട്ടാന്‍ നോക്കിയെങ്കിലും നടന്നില്ലെന്ന് മുഖ്യമന്ത്രി പിണറായി വിജയന്‍. എന്തും വിളിച്ചുപറയാമെന്നു കരുതരുത്. ഏതു കൊലകൊമ്പന്‍ ആണെങ്കിലും സമ്മതിക്കില്ലെന്നും മുഖ്യമന്ത്രി പറഞ്ഞു. 'നിങ്ങള്‍ ചെയ്യുന്നത് നിങ്ങളുടെ വിശ്വാസ്യതയെ ബാധിക്കുമോയെന്ന് പരിശോധിക്കണം. ഇതിനുള്ള സമയം അതിക്രമിച്ചിരിക്കുന്നു. നിങ്ങളെ നാടിനു വേണ്ടവരാണ്. ജനങ്ങളില്‍ പൂര്‍ണവിശ്വാസമുണ്ട്. അവര്‍ സര്‍ക്കാരിനെ പൂര്‍ണമായും പിന്താങ്ങും.'- മുഖ്യമന്ത്രി പറഞ്ഞു. കോട്ടയത്ത് കേരള ഗസറ്റഡ് ഓഫിസേഴ്‌സ് അസോസിയേഷന്‍ (കെജിഒഎ) സമ്മേളനത്തില്‍ സംസാരിക്കുകയായിരുന്നു മുഖ്യമന്ത്രി. സ്വര്‍ണക്കടത്തു കേസില്‍ ഉള്‍പ്പെടെ സ്വപ്ന സുരേഷിന്റെ വെളിപ്പെടുത്തലിനു പിന്നാലെ മുഖ്യമന്ത്രി പങ്കെടുക്കുന്ന ആദ്യ പൊതുപരിപാടിയാണ് കോട്ടയത്തേത്. മുഖ്യമന്ത്രി എത്തുന്നതിനോട് അനുബന്ധിച്ച് കടുത്ത ഗതാഗതനിയന്ത്രണമാണ് കോട്ടയം നഗരത്തില്‍ ഏര്‍പ്പെടുത്തിയത്. ഇതിനെത്തുടര്‍ന്ന് വന്‍ഗതാഗതക്കുരുക്കാണ് അനുഭവപ്പെട്ടത്. കാല്‍നടയാത്രക്കാരെ ഉള്‍പ്പെടെ പൊലീസ് തടഞ്ഞുവച്ചതായി ആക്ഷേപമുണ്ട്. പലയിടത്തും യാത്രക്കാരും പൊലീസും തമ്മില്‍ തര്‍ക്കമുണ്ടായി.