ദുബായ് മലയാളിക്ക് 21 ലക്ഷം രൂപ ലോട്ടറി അടിച്ചു

ദുബായ് മലയാളിക്ക് 21 ലക്ഷം രൂപ ലോട്ടറി അടിച്ചു. 79-ാം മഹ്സൂസ് ഡ്രോയിലാണ് മുഹമ്മദിനെ തേടി ഭാഗ്യമെത്തിയത്. കഴിഞ്ഞ ആറ് വര്‍ഷമായി ദുബായില്‍ പ്രവാസ ജീവിതം നയിക്കുന്ന വ്യക്തിയാണ് മുഹമ്മദ്. എട്ട് സഹോദരങ്ങളുള്‍പ്പെടുന്ന കുടുംബമാണ് മുഹമ്മദിനുള്ളത്. ഈ വര്‍ഷം അവസാനം വിവാഹിതനാകാനിരിക്കെയാണ് മുഹമ്മദിനെ ഭാഗ്യദേവത കടാക്ഷിക്കുന്നത്. 100,000 ദിര്‍ഹം മഹ്സൂസ് ഡ്രോ നടക്കുമ്പോള്‍ മുഹമ്മദ് പുറത്തായിരുന്നു. തിരികെ വീട്ടിലെത്തി വൈഫൈ കണക്ട് ചെയ്തപ്പോഴാണ് വിജയിയെ പ്രഖ്യാപിച്ച് കൊണ്ട് ഇ-മെയില്‍ ലഭിക്കുന്നത്. ആദ്യം തന്റെ പേര് കണ്ടപ്പോള്‍ മുഹമ്മദിന് വിശ്വസിക്കാന്‍ സാധിച്ചില്ല. മഹ്സൂസ് അക്കൗണ്ട് പരിശോധിച്ചപ്പോഴാണ് വിശ്വാസം വന്നതെന്ന് മുഹമ്മദ് പറയുന്നു. 'കല്യാണത്തിന് വലിയ ചിലവാണ്. കൃത്യ സമയത്താണ് പണം ലഭിക്കുന്നത്. അതുകൊണ്ട് തന്നെ വിവാഹ ചെലവുകള്‍ നടത്താന്‍ സാധിക്കും. ഉമ്മയ്ക്ക് സ്വര്‍ണം സമ്മാനമായി നല്‍കണമെന്നാണ് ആഗ്രഹം'- മുഹമ്മദ് പറയുന്നു. ദുബായില്‍ സുഗന്ധദ്രവ്യങ്ങളും വില്‍ക്കുന്ന കടയാണ് മുഹമ്മദിന്. മഹ്സൂസ് ഡ്രോയില്‍ നിന്ന് ലഭിച്ച പണം കച്ചവടെ വിപുലീകരിക്കുന്നതിന് ഉപയോഗിക്കുമെന്നും മുഹമ്മദ് പറഞ്ഞു.