വേണം ‘വികസനക്കര’ ; മാറാനുറച്ച് തൃക്കാക്കര ; വികസന നയരേഖ മുന്നോട്ടുവച്ച് എല്‍ഡിഎഫ്

നവകേരളത്തിന്റെ വികസനക്കുതിപ്പിനൊപ്പം മുന്നേറാനൊരുങ്ങുന്ന തൃക്കാക്കരയിലെ ജനവിധിക്ക് മണിക്കൂറുകള്‍ ബാക്കി. പൊടിപാറിയ ഉപതെരഞ്ഞെടുപ്പു പ്രചാരണം ഞായറാഴ്ച കൊട്ടിക്കലാശിച്ചു. തിങ്കളാഴ്ച നിശ്ശബ്ദപ്രചാരണം. ജനകീയ ഡോക്ടര്‍ ജോ ജോസഫിനെ മുന്നില്‍നിര്‍ത്തി തൃക്കാക്കരയുടെ വികസനവും രാഷ്ട്രീയവും അജന്‍ഡയാക്കിയാണ് എല്‍ഡിഎഫ് പ്രചാരണത്തിനിറങ്ങിയത്. വിവാദങ്ങളെ കൂട്ടുപിടിച്ച് കുളംകലക്കാനിറങ്ങിയ യുഡിഎഫിനെ തൊട്ടതെല്ലാം തിരിഞ്ഞുകുത്തി. വികസനനായകന്‍ മുഖ്യമന്ത്രി പിണറായി വിജയന്‍ എത്തിയതോടെ പ്രചാരണം ഹൈ വോള്‍ട്ടേജായി. വികസനത്തില്‍ തൃക്കാക്കര ഏതുപക്ഷത്ത് എന്ന മുഖ്യമന്ത്രിയുടെ ചോദ്യംതന്നെയാണ് അവസാനറൗണ്ടുവരെ പ്രചാരണത്തിന്റെ ഗതി നിര്‍ണയിച്ചത്. കെ--റെയിലും മെട്രോ റെയിലും ജല മെട്രോയും വമ്പന്‍ റോഡും ഉള്‍പ്പെടുന്ന യാത്രാഹബ്ബായി മണ്ഡലത്തെ മാറ്റാനുള്ള പദ്ധതി മുതല്‍ ഓരോ വില്ലേജിലും കളിക്കളംവരെയുള്ള പദ്ധതി മുന്നോട്ടുവച്ചു. എന്നാല്‍ പ്രകടനപത്രിക ഇറക്കാന്‍പോലും യുഡിഎഫിനായില്ല. പാളയത്തിലെ പടയും പ്രശ്നങ്ങള്‍ സങ്കീര്‍ണമാക്കി. എല്‍ഡിഎഫ് വികസനനയത്തെ പിന്തുണച്ച് മുതിര്‍ന്ന കോണ്‍ഗ്രസ് നേതാവ് കെ വി തോമസും പ്രചാരണത്തിനിറങ്ങി. യുഡിഎഫ് സ്ഥാനാര്‍ഥിയെ നിശ്ചയിച്ചത് പ്രതിപക്ഷനേതാവും കെപിസിസി പ്രസിഡന്റും മാത്രമറിഞ്ഞെന്ന ആക്ഷേപവുമായി യുഡിഎഫ് ജില്ലാ ചെയര്‍മാന്‍ ഡൊമിനിക് പ്രസന്റേഷനും ഡിസിസി ജനറല്‍ സെക്രട്ടറി എം ബി മുരളീധരനും പരസ്യ പ്രതികരണം നടത്തി. എം ബി മുരളീധരന്‍ എല്‍ഡിഎഫ് സ്ഥാനാര്‍ഥിക്ക് പിന്തുണയും പ്രഖ്യാപിച്ചു. തുടക്കംമുതല്‍ ഡോ. ജോക്കെതിരെ വ്യക്തി അധിക്ഷേപം തുടരുന്ന യുഡിഎഫ് വ്യാജ അശ്ലീലവീഡിയോ വരെ പ്രചരിപ്പിച്ചു. വീഡിയോപ്രചാരണത്തെ ന്യായീകരിച്ച പ്രതിപക്ഷനേതാവിനെ എതിര്‍ത്ത് എഐസിസി അംഗങ്ങളായ സിമ്മി റോസ്ബെല്‍ ജോണും പത്മജ വേണുഗോപാലുമടക്കം രംഗത്തെത്തി. ആവേശക്കലാശം പാലാരിവട്ടം റൗണ്ടില്‍ ആവേശമുയര്‍ത്തിയ മുദ്രാവാക്യത്തിന്റെയും താളമേളത്തിന്റെയും ആര്‍പ്പുവിളിയുടെയും അകമ്പടിയില്‍ ഒരുമാസം നീണ്ട തെരഞ്ഞെടുപ്പുപ്രചാരണത്തിന് കലാശക്കൊട്ട്. എല്‍ഡിഎഫ് സ്ഥാനാര്‍ഥി ഡോ. ജോ ജോസഫിന്റെ പൊതുപ്രചാരണ സമാപനസമ്മേളനത്തിന് എല്‍ഡിഎഫ് കണ്‍വീനര്‍ ഇ പി ജയരാജനും മന്ത്രി പി രാജീവും മണ്ഡലം സെക്രട്ടറി എം സ്വരാജും നേതൃത്വം നല്‍കി. യുഡിഎഫ് പ്രചാരണ സമാപനച്ചടങ്ങിന് വി ഡി സതീശനും എന്‍ഡിഎക്കായി കെ സുരേന്ദ്രനും പി കെ കൃഷ്ണദാസും രംഗത്തിറങ്ങി.