മദ്യ നിരോധനം പിന്‍വലിക്കില്ലെന്ന് സൗദി ടൂറിസം മന്ത്രാലയം

സൗദിയില്‍ മദ്യനിരോധനം പിന്‍വലിക്കില്ലെന്ന് ടൂറിസം മന്ത്രാലയം. മദ്യ നിരോധന നിയമം നിലനില്‍ക്കെ ടൂറിസം മേഖലയില്‍ വലിയ വളര്‍ച്ച കൈവരിച്ചതായും, 2021ല്‍ സൗദി സന്ദര്‍ശിച്ച വിദേശ ടൂറിസ്റ്റുകളുടെ എണ്ണം ഉയര്‍ന്നതായും ടൂറിസം സഹ മന്ത്രി. ദാവോസില്‍ നടക്കുന്ന വേള്‍ഡ് വേള്‍ഡ് ഇക്കണോമിക് ഫോറത്തില്‍ സംസാരിക്കുകയായിരുന്നു ഹൈഫ ബിന്‍ത് മുഹമ്മദ് അല്‍ സൗദ്. 60 ദശലക്ഷം ടൂറിസ്റ്റുകള്‍ കഴിഞ്ഞ വര്‍ഷം സൗദിയില്‍ എത്തി. സാമ്പത്തിക ഫോറത്തിന്റെ ടൂറിസം സൂചിക പ്രകാരം 2019 നാല്പത്തി മൂന്നാം സ്ഥാനത്തായിരുന്നു സൗദി, ആഗോളതലത്തില്‍ മുപ്പത്തി മൂന്നാം സ്ഥാനത്തേക്ക് ഉയര്‍ന്നു. മദ്യ നിരോധന നിയമം സൗദിയില്‍ തുടരുമെന്നും മന്ത്രി വ്യക്തമാക്കി. മദ്യനിരോധനം ഉള്‍പ്പെടെയുള്ള നിയന്ത്രണങ്ങള്‍ ഉണ്ടായിട്ടും, ആഗോളതലത്തില്‍ വിനോദസഞ്ചാരികളെ ആകര്‍ഷിക്കുന്നതില്‍ സൗദി ഏറെ മുന്നോട്ടുപോയിട്ടുണ്ട്. തൊഴില്‍ മേഖലയിലെ വനിതാ പ്രാതിനിധ്യം വിഷന്‍ 2030 പദ്ധതി ലക്ഷ്യമിട്ടതിനേക്കാള്‍ വര്‍ധിച്ചതായും മന്ത്രി പറഞ്ഞു. രാജ്യത്തെ ചെറുകിട ഇടത്തരം സംരംഭങ്ങള്‍ 42 ശതമാനവും വനിതകളുടെതാണ്. തൊഴിലവസരം ശമ്പളം തുടങ്ങിയവയില്‍ സ്ത്രീ-പുരുഷ വിവേചനം ഇല്ല. രാജ്യത്ത് ബിരുദം നേടുന്ന സ്ത്രീകളുടെ എണ്ണം പുരുഷന്മാരേക്കാള്‍ കൂടുതല്‍ ആണെന്നും ഹൈഫ അല്‍ സൗദ് കൂട്ടിച്ചേര്‍ത്തു.